Abu Dawood: Hadith 234

اس طریق سے بھی حماد بن سلمہ نے اسی مفہوم کی حدیث روایت کی ہے اس کے شروع میں ہے : تو آپ ﷺ نے تکبیر تحریمہ کہی ، اور آخر میں یہ ہے کہ جب آپ ﷺ نماز سے فارغ ہوگئے تو فرمایا : میں بھی انسان ہی ہوں، میں جنبی تھا ۔ ابوداؤد کہتے ہیں : اسے زہری نے ابوسلمہ بن عبدالرحمٰن سے، انہوں نے ابوہریرہ (رض) سے روایت کیا ہے، اس میں ہے : جب آپ مصلیٰ پر کھڑے ہوگئے اور ہم آپ کی تکبیر (تحریمہ) کا انتظار کرنے لگے، تو آپ (وہاں سے) یہ فرماتے ہوئے پلٹے کہ تم جیسے ہو اسی حالت میں رہو ۔ ابوداؤد کہتے ہیں : ایوب بن عون اور ہشام نے اسے محمد سے، محمد بن سیرین نے نبی اکرم ﷺ سے مرسلاً روایت کیا ہے، اس میں ہے : آپ ﷺ نے تکبیر (تکبیر تحریمہ) کہی، پھر اپنے ہاتھ سے لوگوں کو اشارہ کیا کہ تم لوگ بیٹھ جاؤ، پھر آپ ﷺ چلے گئے اور غسل فرمایا۔ اور اسی طرح اسے مالک نے اسماعیل بن ابوحکیم سے، انہوں نے عطاء بن یسار سے (مرسلاً ) روایت کیا ہے کہ رسول اللہ ﷺ نے نماز میں تکبیر (تکبیر تحریمہ) کہی۔ ابوداؤد کہتے ہیں : اور اسی طرح اسے ہم سے مسلم بن ابراہیم نے بیان کیا ہے، وہ کہتے ہیں کہ : ہم سے ابان نے بیان کیا ہے، ابان یحییٰ سے، اور یحییٰ ربیع بن محمد سے اور ربیع بن محمد نبی اکرم ﷺ سے (مرسلاً ) روایت کرتے ہیں کہ آپ نے تکبیر (تکبیر تحریمہ) کہی۔ تخریج دارالدعوہ : انظر ما قبله، (تحفة الأشراف : ١٨٦٣٤، ١١٦٦٥) (صحیح )