Abu Dawood: Hadith 2428

مجیبہ باہلیہ اپنے والد یا چچا سے روایت کرتی ہیں کہ وہ رسول اللہ ﷺ کی خدمت میں حاضر ہوئے پھر چلے گئے اور ایک سال بعد دوبارہ آئے اس مدت میں ان کی حالت و ہیئت بدل گئی تھی، کہنے لگے : اللہ کے رسول ! کیا آپ مجھے پہچانتے نہیں، آپ ﷺ نے پوچھا : کون ہو ؟ جواب دیا : میں باہلی ہوں جو کہ پہلے سال بھی حاضر ہوا تھا، آپ ﷺ نے کہا : تمہیں کیا ہوگیا ؟ تمہاری تو اچھی خاصی حالت تھی ؟ جواب دیا : جب سے آپ کے پاس سے گیا ہوں رات کے علاوہ کھایا ہی نہیں ١ ؎ آپ ﷺ نے فرمایا : اپنے آپ کو تم نے عذاب میں کیوں مبتلا کیا ؟ پھر فرمایا : صبر کے مہینہ (رمضان) کے روزے رکھو، اور ہر مہینہ ایک روزہ رکھو انہوں نے کہا : اور زیادہ کیجئے کیونکہ میرے اندر طاقت ہے، آپ ﷺ نے فرمایا : دو دن روزہ رکھو ، انہوں نے کہا : اس سے زیادہ کی میرے اندر طاقت ہے، آپ ﷺ نے فرمایا : تین دن کے روزے رکھ لو ، انہوں نے کہا : اور زیادہ کیجئے، آپ ﷺ نے فرمایا : حرمت والے مہینوں میں روزہ رکھو اور چھوڑ دو ، حرمت والے مہینوں میں روزہ رکھو اور چھوڑ دو ، حرمت والے مہینوں میں روزہ رکھو اور چھوڑ دو ، آپ ﷺ نے اپنی تین انگلیوں سے اشارہ کیا، پہلے بند کیا پھر چھوڑ دیا ٢ ؎۔ تخریج دارالدعوہ : سنن ابن ماجہ/(١٧٤١) ، (تحفة الأشراف : ٥٢٤٠) ، وقد أخرجہ : سنن النسائی/ الکبری/ الصیام (٢٧٤٣) ، مسند احمد (٥/٢٨) (ضعیف) (مجیبة کے بارے میں سخت اختلاف ہے، یہ عورت ہیں یا مرد، صحابی ہیں یا تابعی اسی اضطراب کے سبب اس حدیث کو لوگوں نے ضعیف قرار دیا ہے ) وضاحت : ١ ؎ : برابر روزے رکھ رہا ہوں۔ ٢ ؎ : یعنی تین دن روزے رکھو پھر تین دن نہ رکھو، پورے مہینوں میں اسی طرح کرتے رہو۔