مغیرہ بن شعبہ (رض) کہتے ہیں کہ رسول اللہ ﷺ غزوہ تبوک میں فجر سے پہلے مڑے، میں آپ کے ساتھ تھا، میں بھی مڑا، پھر آپ ﷺ نے اونٹ بٹھایا اور قضائے حاجت کی، پھر آئے تو میں نے چھوٹے برتن (لوٹے) سے آپ کے ہاتھ پر پانی ڈالا، آپ ﷺ نے دونوں پہونچے دھوئے، پھر اپنا چہرہ دھویا، پھر آستین سے دونوں ہاتھ نکالنا چاہا مگر جبے کی آستین تنگ تھی اس لیے آپ نے ہاتھ اندر کی طرف کھینچ لیا، اور انہیں جبے کے نیچے سے نکالا، پھر دونوں ہاتھوں کو کہنیوں تک دھویا، اور اپنے سر کا مسح کیا، پھر دونوں موزوں پر مسح کیا، پھر سوار ہوگئے، پھر ہم چل پڑے، یہاں تک کہ ہم نے لوگوں کو نماز کی حالت میں پایا، ان لوگوں نے عبدالرحمٰن بن عوف (رض) کو (امامت کے لیے) آگے بڑھا رکھا تھا، انہوں نے حسب معمول وقت پر لوگوں کو نماز پڑھائی، جب ہم پہنچے تو عبدالرحمٰن بن عوف فجر کی ایک رکعت پڑھا چکے تھے، رسول اللہ ﷺ مسلمانوں کے ساتھ صف میں شریک ہوگئے، آپ ﷺ نے عبدالرحمٰن بن عوف کے پیچھے دوسری رکعت پڑھی، پھر جب عبدالرحمٰن نے سلام پھیرا تو آپ ﷺ اپنی نماز پوری کرنے کے لیے کھڑے ہوئے، یہ دیکھ کر مسلمان گھبرا گئے، اور لوگ سبحان اللہ کہنے لگے، کیونکہ انہوں نے نبی اکرم ﷺ سے پہلے نماز شروع کردی تھی، جب رسول اللہ ﷺ نے سلام پھیرا تو ان سے فرمایا : تم لوگوں نے ٹھیک کیا ، یا فرمایا : تم لوگوں نے اچھا کیا ۔ تخریج دارالدعوہ : صحیح البخاری/الوضوء ٣٥(١٨٢) ، ٤٨ (٢٠٣) ، ٤٩ (٢٠٦) ، المغازي ٨١ (٤٤٢١) ، اللباس ١١ (٥٧٩٩) ، صحیح مسلم/الطھارة ٢٣ (٢٧٤) ، سنن النسائی/الطھارة ٦٣ (٧٩) ، ٦٦ (٨٢) ، ٩٦ (١٢٤) ، ٩٧ (١٢٥) ، سنن ابن ماجہ/الطھارة ٨٤ (٥٤٥) ، (تحفة الأشراف : ١١٥١٤) ، وقد أخرجہ : موطا امام مالک/الطھارة ٨ (٤١) ، مسند احمد (٤/ ٢٤٩، ٢٥١، ٢٥٤، ٢٥٥) ، سنن الدارمی/الطھارة ٤١ (٧٤٠) (صحیح )