ابوہریرہ (رض) کہتے ہیں کہ (ایک مرتبہ) نماز کے لیے اقامت ہوگئی اور لوگوں نے صفیں باندھیں تو رسول اللہ ﷺ نکلے، یہاں تک کہ جب اپنی جگہ پر (آ کر) کھڑے ہوگئے، تو آپ کو یاد آیا کہ آپ نے غسل نہیں کیا ہے، آپ نے لوگوں سے کہا : تم سب اپنی جگہ پر رہو ، پھر آپ گھر واپس گئے اور ہمارے پاس (واپس) آئے، تو آپ کے سر مبارک سے پانی ٹپک رہا تھا اور حال یہ تھا کہ آپ نے غسل کر رکھا تھا اور ہم صف باندھے کھڑے تھے۔ یہ ابن حرب کے الفاظ ہیں، عیاش نے اپنی روایت میں کہا ہے : ہم لوگ اسی طرح (صف باندھے) کھڑے آپ ﷺ کا انتظار کرتے رہے، یہاں تک کہ آپ ہمارے پاس تشریف لائے، آپ غسل کئے ہوئے تھے۔ تخریج دارالدعوہ : صحیح البخاری/الغسل ١٧ (٢٧٥) ، والأذان ٢٥ (٦٣٩) ، صحیح مسلم/المساجد ٢٩ (٦٠٥) ، سنن النسائی/الإمامة ١٤ (٧٩٣) ، ٢٤ (٨١٠) ، (تحفة الأشراف : ١٥٢٠٠، ١٥٢٦٤، ١٥١٩٣، ١٥٢٧٥، ١٥٣٠٩) ، وقد أخرجہ : مسند احمد (٢/٢٣٧، ٢٥٩، ٢٨٣، ٣٣٨، ٣٣٩) ، ویأتي مختصراً برقم : (٥٤١) (صحیح )