میں اپنے والد کے ساتھ حجۃ الوداع میں نکلی، تو میں نے رسول اللہ (ﷺ) کو دیکھا، اور لوگوں کو کہتے ہوئے سنا کہ یہ رسول اللہ (ﷺ) ہیں، میں نے آپ پر اپنی نظریں گاڑ دیں، میرے والد آپ (ﷺ) سے قریب ہوئے آپ اپنی ایک اونٹنی پر سوار تھے، آپ (ﷺ) کے پاس معلمین مکتب کے درہ کے طرح ایک درہ تھا، میں نے بدویوں اور لوگوں کو کہتے ہوئے سنا: شن شن ( درے کی آواز جو تیزی سے مارتے اور گھماتے وقت نکلتی ہے ) تو میرے والد آپ (ﷺ) سے قریب ہو گئے اور ( جا کر ) آپ کے قدم پکڑ لیے، آپ (ﷺ) کی رسالت کا اعتراف و اقرار کیا، آپ کھڑے ہو گئے اور ان کی باتیں آپ نے توجہ سے سنیں، پھر انہوں نے کہا: اللہ کے رسول! میں نے نذر مانی ہے کہ اگر میرے یہاں لڑکا پیدا ہو گا تو میں بوانہ کی دشوار گزار پہاڑیوں میں بہت سی بکریوں کی قربانی کروں گا۔ راوی کہتے ہیں: میں یہی جانتا ہوں کہ انہوں نے پچاس بکریاں کہیں۔ آپ (ﷺ) نے پوچھا: کیا وہاں کوئی بت بھی ہے؟ انہوں نے کہا: نہیں، تو آپ (ﷺ) نے فرمایا: تم نے اللہ کے لیے جو نذر مانی ہے اسے پوری کرو انہوں نے ( بکریاں ) اکٹھا کیں، اور انہیں ذبح کرنے لگے، ان میں سے ایک بکری بدک کر بھاگ گئی تو وہ اسے ڈھونڈنے لگے اور کہہ رہے تھے اے اللہ! میری نذر پوری کر دے پھر وہ اسے پا گئے تو ذبح کیا۔