عباس بن عبدالمطلب (رض) کہتے ہیں کہ میں بطحاء میں ایک جماعت کے ساتھ تھا، جس میں رسول اللہ ﷺ بھی موجود تھے، اتنے میں بادل کا ایک ٹکڑا ان کے پاس سے گزرا تو آپ نے اس کی طرف دیکھ کر پوچھا : تم اسے کیا نام دیتے ہو ؟ لوگوں نے عرض کیا : سحاب (بادل) ، آپ ﷺ نے فرمایا : اور مزن بھی لوگوں نے کہا : ہاں مزن بھی، آپ ﷺ نے فرمایا : اور عنان بھی لوگوں نے عرض کیا : اور عنان بھی، (ابوداؤد کہتے ہیں : عنان کو میں اچھی طرح ضبط نہ کرسکا) آپ ﷺ نے پوچھا : کیا تمہیں معلوم ہے کہ آسمان اور زمین کے درمیان کتنی دوری ہے ؟ لوگوں نے عرض کیا : ہمیں نہیں معلوم، آپ ﷺ نے فرمایا : ان دونوں کے درمیان اکہتر یا بہتر یا تہتر سال کی مسافت ہے، پھر اسی طرح اس کے اوپر آسمان ہے یہاں تک کہ آپ ﷺ نے سات آسمان گنائے پھر ساتویں کے اوپر ایک سمندر ہے جس کی سطح اور تہہ میں اتنی دوری ہے جتنی کہ ایک آسمان اور دوسرے آسمان کے درمیان ہے، پھر اس کے اوپر آٹھ جنگلی بکرے ہیں جن کے کھروں اور گھٹنوں کے درمیان اتنی لمبائی ہے جتنی ایک آسمان سے دوسرے آسمان تک کی دوری ہے، پھر ان کی پشتوں پر عرش ہے، جس کے نچلے حصہ اور اوپری حصہ کے درمیان کی مسافت اتنی ہے جتنی ایک آسمان سے دوسرے آسمان کی، پھر اس کے اوپر اللہ تعالیٰ ہے ۔ تخریج دارالدعوہ : سنن الترمذی/تفسیر الحاقة ٦٧ (٣٣٢٠) ، سنن ابن ماجہ/المقدمة ١٣ (١٩٣) ، (تحفة الأشراف : ٥١٢٤) ، وقد أخرجہ : مسند احمد (١/٢٠٦، ٢٠٧) (ضعیف) ( اس کے راوی عبداللہ بن عمیرہ لین الحدیث ہیں ) وضاحت : ١ ؎ : یعنی فرشتے ان کی شکل میں ہیں۔