عدی بن حاتم (رض) سے روایت ہے کہ ایک خطیب نے نبی اکرم ﷺ کے پاس خطبہ دیا، تو اس نے (خطبہ میں) کہا :من يطع الله ورسوله فقد رشد ومن يعصهما جو اللہ اور اس کے رسول کی اطاعت کرتا ہے، وہ راہ راست پر ہے اور جو ان دونوں کی نافرمانی کرتا ہے ... (ابھی اس نے اتنا ہی کہا تھا کہ) آپ نے فرمایا : کھڑے ہوجاؤ یا یوں فرمایا : چلے جاؤ تم بہت برے خطیب ہو ١ ؎۔ تخریج دارالدعوہ : انظر حدیث رقم : (١٠٩٩) ، (تحفة الأشراف : ٩٨٥٠) (صحیح ) وضاحت : ١ ؎ : علماء کا کہنا ہے کہ نبی اکرم ﷺ نے اس خطیب کو اس لئے برا کہا کہ اس نے من يعصهما کہہ کر اللہ اور رسول دونوں کو ایک ہی ضمیر میں جمع کردیا تھا، خطبہ میں باتوں کو تفصیل سے کہنے کا موقع ہوتا ہے، اور سامعین میں ہر سطح کے لوگ ہوتے ہیں، مقام کا تقاضا تفصیل کا تھا یعنی : من یعص اللہ ویعص رسولہ کہنے کا ، تاکہ کسی طرح کا التباس نہ رہ جاتا۔