ام المؤمنین عائشہ (رض) کہتی ہیں کہ رسول اللہ ﷺ نے فرمایا : دس چیزیں دین فطرت ہیں ١ ؎: ١۔ مونچھیں کاٹنا، ٢۔ داڑھی بڑھانا، ٣۔ مسواک کرنا، ٤۔ ناک میں پانی ڈالنا، ٥۔ ناخن کاٹنا، ٦۔ انگلیوں کے جوڑوں کو دھونا، ٧۔ بغل کے بال اکھیڑنا، ٨۔ ناف کے نیچے کے بال مونڈنا ٢ ؎، ٩ ۔ پانی سے استنجاء کرنا ۔ زکریا کہتے ہیں : مصعب نے کہا : میں دسویں چیز بھول گیا، شاید کلی کرنا ہو۔ تخریج دارالدعوہ : صحیح مسلم/الطھارة ١٦ (٢٦١) ، سنن الترمذی/الأدب ١٤ (٢٧٥٧) ، سنن النسائی/الزینة ١ (٥٠٤٣) ، سنن ابن ماجہ/الطھارة ٨ (٢٩٣) ، (تحفة الأشراف : ١٦١٨٨) ، وقد أخرجہ : مسند احمد (٦/١٣٧) (صحیح ) وضاحت : ١ ؎ : اکثر علماء نے فطرت کی تفسیر سنت سے کی ہے ، گویا یہ خصلتیں انبیاء کی سنت ہیں جن کی اقتداء اور پیروی کا حکم اللہ تعالیٰ نے ہمیں اپنے قول : فبهداهم اقتده میں دیا ہے۔ ٢ ؎ : مسلم کی ایک روایت کے مطابق چالیس دن سے زیادہ کی تاخیر اس میں درست نہیں ہے۔ عمار بن یاسر (رض) کہتے ہیں کہ رسول اللہ ﷺ نے فرمایا : کلی کرنا اور ناک میں پانی ڈالنا فطرت میں سے ہے ، پھر انہوں نے اسی جیسی حدیث ذکر کی، داڑھی چھوڑنے کا ذکر نہیں کیا، اس میں ختنہ کا اضافہ کیا ہے، نیز اس میں استنجاء کے بعد لنگی پر پانی چھڑکنے کا ذکر ہے، اور پانی سے استنجاء کرنے کا ذکر نہیں کیا ہے۔ ابوداؤد کہتے ہیں : اسی طرح کی روایت ابن عباس (رض) سے بھی مروی ہے، جس میں پانچ چیزیں ہیں ان میں سب کا تعلق سر سے ہے، اس میں ابن عباس (رض) نے سر میں مانگ نکالنے کا ذکر کیا ہے، اور داڑھی چھوڑنے کا ذکر نہیں کیا ہے۔ ابوداؤد کہتے ہیں : حماد کی حدیث کی طرح طلق بن حبیب، مجاہد اور بکر بن عبداللہ المزنی سے ان سب کا اپنا قول مروی ہے، اس میں ان لوگوں نے بھی داڑھی چھوڑنے کا ذکر نہیں کیا ہے۔ اور محمد بن عبداللہ بن مریم کی روایت جسے انہوں نے ابوسلمہ سے، ابوسلمہ نے ابوہریرہ (رض) سے، ابوہریرہ نے نبی اکرم ﷺ سے روایت کیا ہے، اس میں داڑھی چھوڑنے کا ذکر ہے۔ ابراہیم نخعی سے بھی اسی جیسی روایت مروی ہے اس میں انہوں نے داڑھی چھوڑنے اور ختنہ کرنے کا ذکر کیا ہے۔ تخریج دارالدعوہ : حدیث محمد بن عبداللہ ابن مریم تفرد بہ أبو داود، (تحفة الأشراف : ١٥٠٠٣، ١٠٣٥٠) ، وحدیث موسیٰ بن إسماعیل قد أخرجہ : سنن ابن ماجہ/الطھارة ٨ (٢٩٤) ، مسند احمد (٤/٢٦٤) (حسن) (ام المومنین عائشہ (رض) کی گذشتہ حدیث سے تقویت پا کر یہ حدیث حسن ہے ، ورنہ خود اس کے اندر دو علتیں ہیں : اس کا راوی علی بن جدعان ضعیف ہے اور سلمہ نے عمار بن یاسر (رض) سے حدیث نہیں سنی ہے، اور موسیٰ کی روایت کے مطابق تو اس کے اندر ارسال کی علت بھی ہے )