Sunan Al Bayhaqi: Hadith 13410

(١٣٤٠٤) حضرت عمارہ بن خزیمہ اپنے چچا سے روایت کرتے ہیں کہ رسول اللہ (صلی اللہ علیہ وآلہ وسلم) نے کسی دیہاتی سے گھوڑا خریدا اور اس سے بکوانے کی خواہش کی تاکہ گھوڑے کی قیمت کا معاملہ حل ہوجائے، رسول اللہ (صلی اللہ علیہ وآلہ وسلم) جلدی چلے اور اس نے سست روی کی تو لوگ دیہاتی کے پاس آکر اس گھوڑے کی قیمت کا بھاؤ کرنے لگے اور انھیں معلوم نہیں تھا کہ رسول اللہ (صلی اللہ علیہ وآلہ وسلم) اس گھوڑے کو خرید چکے ہیں، ان میں سے بعض نے گھوڑے کی قیمت اس قیمت سے زیادہ لگا دی، جس میں رسول اللہ (صلی اللہ علیہ وآلہ وسلم) نے خریدا تھا۔ جب دیہاتی نے قیمت زیادہ دیکھی تو اس نے رسول اللہ (صلی اللہ علیہ وآلہ وسلم) کو آواز دی۔ اگر آپ اس گھوڑے کو خریدنا چاہتے ہیں تو خرید لیں وگرنہ میں اس کو ضرور بیچ دوں گا، آپ (صلی اللہ علیہ وآلہ وسلم) آواز سن کر ٹھہر گئے اور جب دیہاتی آپ کے پاس آیا تو آپ (صلی اللہ علیہ وآلہ وسلم) نے اس سے کہا : کیا میں نے تجھ سے خرید نہیں لیا۔ دیہاتی نے کہا : اللہ کی قسم ! میں نے آپ کو نہیں بیچا۔ رسول اللہ (صلی اللہ علیہ وآلہ وسلم) نے فرمایا : کیوں نہیں۔ میں تجھ سے خرید چکا ہوں۔ لوگ آپ اور دیہاتی کے گرد جمع ہوگئے۔ دیہاتی نے کہا : کوئی گواہ لاؤ جو گواہی دے کہ میں نے آپ کو بیچا ہے۔ بعض مسلمانوں نے دیہاتی سے کہا : تیرا ستیاناس ہو۔ رسول اللہ (صلی اللہ علیہ وآلہ وسلم) صرف سچ بات کہہ رہے ہیں، یہاں تک کہ خزیمہ (رض) آئے تو انھوں نے رسول اللہ (صلی اللہ علیہ وآلہ وسلم) کی بات اور دیہاتی کی بات سنی، دیہاتی کہہ رہا تھا : کوئی گواہ لاؤ جو گواہی دے کہ میں نے آپ (صلی اللہ علیہ وآلہ وسلم) کو گھوڑا بیچا ہے۔ حضرت خزیمہ نے کہا : میں گواہی دیتا ہوں کہ تو نے آپ (صلی اللہ علیہ وآلہ وسلم) کو بیچا ہے۔ رسول اللہ (صلی اللہ علیہ وآلہ وسلم) حضرت خزیمہ کی طرف متوجہ ہوئے اور کہا : تو کس دلیل کی بنا پر گواہی دیتا ہے، انھوں نے کہا : آپ کے سچا ہونے کے ساتھ، اے اللہ کے رسول ! تو رسول اللہ (صلی اللہ علیہ وآلہ وسلم) نے خزیمہ (رض) کی گواہی کو ٢ آدمیوں کی گواہی کے قائم مقام قرار دیا۔ واللہ اعلم۔