Sunan Al Bayhaqi: Hadith 15003

(١٤٩٩٧) ابوعبید حضرت عمر (رض) کی حدیث میں فرماتے ہیں کہ ان کے پاس ایک آدمی لایا گیا، جس کو اس کی عورت نے یہ کہا تھا : مجھے تشبیہ دو ۔ اس نے کہا : تو ہرن جیسی ہے گویا کہ تو کبوتری ہے۔ عورت نے کہا : میں راضی نہیں ہوں گی یہاں تک کہ تو کہے (خَلِیّۃُ طَالِقٌ) (یہ لفظ طلاق سے کنایہ ہے اگر طلاق کا ارادہ ہو تو طلاق واقع ہوجائے گی وگرنہ نہیں) اس شخص نے یہ لفظ کہہ دیے حضرت عمر (رض) نے فرمایا : اس کا ہاتھ پکڑو یہ تیری بیوی ہے۔
(خَلِیّۃُ طَالِقٌ) ابوعبید کہتے ہیں اس سے مراد اونٹنی ہے جس کو باندھا گیا تھا، پھر اس کو کھول دیا گیا اس وقت بولتے ہیں، خلیۃ من العقال کہ یہ چھوڑی ہوئی ہے تو مرد نے یہ ارادہ کیا تھا تو حضرت عمر (رض) نے طلاق والی نیت کا خاتمہ کردیا اور جو شخص ایسا لفظ بولے جو لفظ طلاق کے مشابہہ ہو لیکن نیت طلاق کی نہ ہو تو طلاق واقع نہیں ہوتی۔
شیخ (رح) فرماتے ہیں : اس شخص نے اپنی عورت کو نہ تو طلاق بھیجی اور نہ ہی ان الفاظ کے ساتھ مخاطب کیا کہ اس پر طلاق واقع ہو تو اس احتمال کی وجہ سے حضرت عمر (رض) نے طلاق کو ساقط کردیا۔