Sunan Al Bayhaqi: Hadith 15111

(١٥١٠٥) امام مالک ثابت احنف سے نقل فرماتے ہیں اس نے عبدالرحمن بن زید بن خطاب کی ام ولد سے شادی کرلی۔ کہتے ہیں کہ عبداللہ بن عبدالرحمن نے مجھے بلایا جب میں ان کے پاس آیا تو ان کے سامنے کوڑے رکھے ہوئے تھے اور لوہے کی زنجیر تھی اور دو غلام اس نے بٹھا رکھے تھے۔ کہنے لگے : اس کو طلاق دو وگرنہ۔۔۔ اس نے قسم اٹھا کے کہا : میں تیرے ساتھ یہ یہ کروں گا، کہتے ہیں : میں نے کہا : ہزار طلاقیں۔ میں اس کے پاس سے نکلا تو میں نے حضرت عبداللہ بن عمر کو مکہ کے راستے میں پایا۔ میں نے ان کو اپنی حالت بتائی تو حضرت عبداللہ (رض) غصے ہوئے اور فرمانے لگے : یہ کوئی طلاق نہیں ہے، تیری بیوی تیرے لیے حرام نہیں ہوئی تو اپنے اہل کے پاس جا۔ کہتے ہیں : میرا دلی اطمینان نہ ہوا یہاں تک کہ میں عبداللہ بن زبیر (رض) کے پاس آیا، وہ اس دن مکہ میں تھے۔ میں نے ان کو اپنی حالت بتائی تو انھوں نے بھی عبداللہ بن عمر (رض) کی طرح کہا تو عبداللہ بن زبیر نے مجھے فرمایا : وہ تیرے اوپر حرام نہیں تو اپنی بیوی کے پاس جا اور جابر بن اسود زہری کو دیکھا جو مدینہ کے امیر تھے کہ وہ عبداللہ بن عبدالرحمن کو سزا دے اور یہ کہ وہ میرے اور میری گھر والی کے درمیان رکاوٹ نہ بنے۔ میں آیا تو صفیہ بنت ابی عبید یعنی ابن عمر (رض) کی بیوی نے میری عورت کو تیار کیا اور ابن عمر (رض) کے جانتے ہوئے اس کو میرے اوپر داخل کردیا۔ پھر میں نے اپنے ولیمے کی دعوت میں حضرت عبداللہ بن عمر (رض) کو بھی بلایا۔