Sunan Al Bayhaqi: Hadith 15841

(١٥٨٣٥) حضرت جابر (رض) فرماتے ہیں کہ طفیل بن عمرو دوسی نبی (صلی اللہ علیہ وآلہ وسلم) کے پاس آیا اور کہنے لگا : کیا آپ کے پاس کوئی قلعہ محفوظ پناہ گاہ ہے ؟ جاہلیت میں دوس کا ایک قلعہ تھا۔ آپ (صلی اللہ علیہ وآلہ وسلم) نے انکار کردیا، جب آپ (صلی اللہ علیہ وآلہ وسلم) نے مدینہ کی طرف ہجرت فرمائی تو طفیل اور ایک اور شخص نے آپ کے ساتھ ہجرت فرمائی۔ مدینہ پہنچ کر یہ بیمار ہوگئے تو شدت تکلیف کی وجہ سے اس دوسرے شخص نے اپنا ہاتھ زخمی کرلیا۔ جس سے خون بہنا شروع ہوگیا اور وہ مرگیا تو طفیل نے خواب میں اسے اچھی حالت میں دیکھا اور یہ دیکھا کہ اس نے اپنا ہاتھ ڈھانپا ہوا ہے تو طفیل ان سے پوچھنے لگے۔ تم نے اپنا ہاتھ کیوں ڈھانپا ہوا ہے تو وہ شخص کہنے لگا کہ مجھے کہا گیا کہ جس کو تو نے خود خراب کیا ہے ہم اسے ٹھیک نہیں کریں گے تو طفیل نے سارا خواب نبی (صلی اللہ علیہ وآلہ وسلم) کو سنایا تو آپ (صلی اللہ علیہ وآلہ وسلم) نے فرمایا : ” اے اللہ ! اس کے ہاتھ کو بھی معاف فرما دے۔ “