Sunan Al Bayhaqi: Hadith 15854

(١٥٨٤٨) ابو بکرہ (رض) سے روایت ہے کہ آپ نے منیٰ کے دن خطبہ ارشاد فرمایا اور فرمایا : کیا تم جانتے ہو آج کون سا دن ہے ؟ ہم نے کہا : اللہ اور اس کے رسول بہتر جانتے ہیں۔ آپ خاموش ہوگئے، ہم نے سمجھا کہ آپ اس کا کوئی اور نام لیں گے۔ پھر فرمایا : کیا آج قربانی کا دن نہیں ؟ ہم نے کہا : جی ہاں ! پھر پوچھا : یہ کون سا شہر ہے ؟ ہم نے کہا : اللہ اور اس کا رسول بہتر جانتے ہیں۔ فرمایا : کیا یہ حرمت والا شہر نہیں ہے ؟ ہم نے کہا : کیوں نہیں، یا رسول اللہ ! تو آپ نے فرمایا : تمہارا خون تمہارے مال تمہاری عزتیں اس شہر اور اس دن کی حرمت کی طرح قابل احترام ہیں۔ کیا میں نے تمہیں پہنچا دیا ؟ ہم نے کہا : جی ہاں ! تو فرمایا : اے اللہ ! کے گواہ بن جا۔ حاضر غائب کو یہ بات بتادے، کیونکہ کتنے پہنچانے والے ہیں جن سے وہ لوگ زیادہ یاد رکھتے ہیں کہ جن کو پہنچائی جائے۔ پھر فرمایا : میرے بعد کفر میں نہ لوٹ جانا اور پھر تم آپس میں قتل و غارت کرو۔