Sunan Al Bayhaqi: Hadith 1894

(١٨٩٤) سیدنا ابوہریرہ (رض) سے روایت ہے کہ رسول اللہ (صلی اللہ علیہ وآلہ وسلم) نے ہمارے ساتھ پڑاؤ ڈالا، جب آپ (صلی اللہ علیہ وآلہ وسلم) خیبر سے لوٹے۔ آپ (صلی اللہ علیہ وآلہ وسلم) نے فرمایا : کون ہماری نماز کی حفاظت کرے گا ؟ بلال (رض) نے کہا : میں، (رات کو) وہ سو گئے یہاں تک کہ سورج طلوع ہوگیا۔ آپ (صلی اللہ علیہ وآلہ وسلم) نے فرمایا : اے بلال ! آپ سو گئے تھے ؟ انھوں نے کہا : میری جان کو اس نے پکڑ لیا جس کو آپ کی جانوں نے پکڑا تھا (یعنی نیند نے) ۔ آپ (صلی اللہ علیہ وآلہ وسلم) نے بلال (رض) کو حکم دیا تو انھوں نے اذان دی اور اقامت کہی، رسول اللہ (صلی اللہ علیہ وآلہ وسلم) نے فرمایا : اپنی جگہ سے کوچ کرو یہاں تم کو غفلت پہنچی ہے۔ پھر رسول اللہ (صلی اللہ علیہ وآلہ وسلم) نے فرمایا : تم میں سے اگر کوئی نماز بھول جائے تو جب اس کو یاد آئے وہ پڑھ لے۔ اللہ عزوجل نے فرمایا : { أَقِمِ الصَّلاَۃَ لِذِکْرِی }
(ب) مؤطا میں زہری نے ابن مسیب سے مرسلاًنقل کیا ہے اور اس میں اذان کا ذکر کیا ہے۔ نیز فرماتے ہیں کہ اس قصے میں اذان کا کہنا صحیح اور ثابت ہے۔