Sunan Al Bayhaqi: Hadith 20714

(٢٠٧٠٨) رجاء بن حیرہ اور عرس بن عمیرہ اپنے والد عدی سے نقل فرماتے ہیں کہ امرء القیس اور حضرموت کے ایک آدمی کے درمیان جھگڑا تھا۔ وہ نبی (صلی اللہ علیہ وآلہ وسلم) کے پاس جھگڑا لے کر آئے۔ آپ (صلی اللہ علیہ وآلہ وسلم) نے فرمایا : دلیل لاؤ یا قسم اٹھاؤ۔ اس نے کہا : اے اللہ کے رسول ! یہ میری زمین قسم اٹھا کرلے جائے گا۔ آپ نے فرمایا : جس نے جھوٹی قسم کے ذریعے اپنے بھائی کا مال لیا وہ اللہ سے ملاقات کرے گا اور اللہ اس سے ناراض ہوگا۔ امرء قیس کہتے ہیں : اے اللہ کے رسول ! جس نے حق پر ہوتے ہوئے بھی چھوڑ دیا ؟ فرمایا : جنت ملے گی۔ اس نے کہا : وہ بیشک میری ہے میں اس کو چھوڑتا ہوں۔
(ب) عدی کہتے ہیں کہ عرس بن عمیرہ کی حدیث میں ہے کہ آیت نازل ہوئی : { اِنَّ الَّذِیْنَ یَشْتَرُوْنَ بِعَھْدِ اللّٰہِ وَ اَیْمَانِھِمْ ثَمَنًا قَلِیْلًا } [آل عمران ٧٧] ” وہ لوگ جو اللہ کے عہد اور اپنی قسموں کے عوض تھوڑی قیمت وصول کرتے ہیں۔ “