Sunan Al Bayhaqi: Hadith 2251

(٢٢٥٠) حضرت سہل بن حنظلیہ سے روایت ہے کہ جب رسول اللہ (صلی اللہ علیہ وآلہ وسلم) حنین کی جانب روانہ ہوئے تو فرمایا : رات کو ہم پر پہرہ کون دے گا ؟ انس بن ابومرثد غنوی نے عرض کیا : اے اللہ کے رسول ! میں دوں گا۔ آپ (صلی اللہ علیہ وآلہ وسلم) نے فرمایا : ٹھیک ہے۔ جب صبح ہوئی تو آپ (صلی اللہ علیہ وآلہ وسلم) نماز پڑھانے نکلے اور فرمایا : کیا تم نے اپنے گھڑ سوار کے بارے میں پتا لگا لیا ہے۔ انھوں نے عرض کیا : نہیں ! آپ (صلی اللہ علیہ وآلہ وسلم) نماز پڑھانے لگے اور گھاٹی کی طرف بھی جھانکا۔ جب آپ (صلی اللہ علیہ وآلہ وسلم) نے سلام پھیرا تو فرمایا : تمہارا گھڑ سوار آچکا ہے۔ جب وہ (انس بن ابو مرثد) آئے تو آپ (صلی اللہ علیہ وآلہ وسلم) نے فرمایا : شاید تم سواری سے اترے تھے۔ انھوں نے عرض کیا : نہیں البتہ نماز اور قضائے حاجت کے لیے اترا تھا۔ پھر عرض کیا کہ میں دو وادیوں میں گیا۔ وہاں کچھ لوگ اپنے تیز رفتار اونٹوں، بھیڑوں اور بکریوں کے ساتھ تھے اور حنین کی طرف جا رہے تھے۔ رسول اللہ (صلی اللہ علیہ وآلہ وسلم) نے فرمایا : ان شاء اللہ ! کل یہ مسلمانوں کو بطور غنیمت ملیں گے۔ پھر طویل حدیث ذکر کی۔