Sunan Al Bayhaqi: Hadith 2927

(٢٩٢٧) حضرت ابوہریرہ (رض) سے روایت ہے کہ رسول اللہ (صلی اللہ علیہ وآلہ وسلم) نے فرمایا : جس شخص نے نماز میں سورة فاتحہ نہیں پڑھی تو وہ نماز ناقص ہے، تین مرتبہ فرمایا۔ ابو سائب بیان کرتے ہیں : میں نے ابوہریرہ (رض) سے کہا : میں بعض اوقات امام کے پیچھے ہوتا ہوں تو انھوں نے میرے بازو کو پکڑ کر کہا : اے فارسی ! اسے اپنے دل میں پڑھ لیا کر؛ کیونکہ میں نے رسول اللہ (صلی اللہ علیہ وآلہ وسلم) کو فرماتے ہوئے سنا ہے کہ اللہ تعالیٰ فرماتے ہیں : میں نے نماز کو اپنے اور بندے کے درمیان آدھا آدھا تقسیم کردیا ہے۔ اس کا نصف میرے لیے ہے اور نصف میرے بندے کے لیے ہے اور میرے بندے کے لیے وہ ہے جو اس نے مانگا۔ جب بندہ کہتا ہے : { الْحَمْدُ لِلَّہِ رَبِّ الْعَالَمِینَ } ” تمام تعریفیں اللہ کے لیے ہیں جو سب جہانوں کا پالنے والا ہے۔ “ تو اللہ تعالیٰ فرماتے ہیں : میرے بندے نے میری تعریف بیان کی ہے۔ جب بندہ کہتا ہے : { الرَّحْمَنِ الرَّحِیمِ } ” بڑا مہربان نہایت رحم کرنے والا ہے۔ “ تو اللہ فرماتے ہیں : ” میرے بندے نے میری ثنا بیان کی “ اور جب بندہ کہتا ہے : { مَالِکِ یَوْمِ الدِّینِ } ” جزا کے دن کا مالک ہے۔ “ تو اللہ تعالیٰ فرماتے ہیں : ” میرے بندے نے میری عظمت بیان کی۔ “ جب بندہ کہتا ہے : {إِیَّاکَ نَعْبُدُ وَإِیَّاکَ نَسْتَعِینُ } ” ہم تیری ہی عبادت کرتے ہیں اور تجھ ہی سے مدد طلب کرتے ہیں۔ “ تو اللہ تعالیٰ فرماتے ہیں : یہ میرے اور میرے بندے کے درمیان ہے اور میرے بندے کے لیے وہی ہے جس کا اس نے سوال کیا۔ “
ولید بن کثیر کی حدیث میں ہے کہ جب بندہ کہتا ہے : { مَالِکِ یَوْمِ الدِّینِ } ” قیامت کے دن کا مالک ہے۔ “ تو اللہ تعالیٰ فرماتے ہیں : میرے بندے نے میری عظمت بیان کی۔ یہ میرے لیے ہے اور باقی میرے بندے کے لیے ہے۔ جب بندہ کہتا ہے : {إِیَّاکَ نَعْبُدُ وَإِیَّاکَ نَسْتَعِینُ } پھر پوری سورت پڑھی۔