Sunan Al Bayhaqi: Hadith 2980

(٢٩٨٠) (ا) عامر بن سعد اپنے والد سعد (رض) سے روایت کرتے ہیں کہ میں نے رسول اللہ (صلی اللہ علیہ وآلہ وسلم) کو نماز میں دو سلام پھیرتے دیکھا۔ آپ دائیں طرف سلام پھیرتے تو کہتے : ( (السَّلاَمُ عَلَیْکُمْ وَرَحْمَۃُ اللَّہِ ) ) ۔ پھر بائیں طرف پھیرتے تو کہتے : السَّلاَمُ عَلَیْکُمْ وَرَحْمَۃُ اللَّہِ یہاں تک کہ آپ کے رخساروں کی سفیدی دونوں طرف سے دکھائی دیتی تھی۔
(ب) اسماعیل بن محمد کہتے ہیں کہ میں نے زہری کے آگے اس کا حدیث کا ذکر کیا تو زہری نے کہا : میں نے رسول اللہ (صلی اللہ علیہ وآلہ وسلم) کی احادیث میں یہ حدیث نہیں سنی تو اسماعیل بن محمد نے کہا کہ کیا رسول اللہ (صلی اللہ علیہ وآلہ وسلم) کی تمام احادیث آپ نے سنی ہیں ؟ زہری نے کہا : نہیں۔ انھوں نے کہا : دو تہائی ؟ انھوں نے کہا : نہیں۔ انھوں نے کہا : چلو آدھی سہی ؟ تو زہری نصف یا ثلث کے وقت رک گئے تو اسماعیل نے انھیں کہا کہ اس حدیث کو ان احادیث میں رکھو جو تم نے نہیں سنیں۔