Sunan Al Bayhaqi: Hadith 3695

(٣٦٩٥) حضرت حجر بن قیس مدری (رح) بیان کرتے ہیں کہ ایک دفعہ میں نے سیدنا علی بن ابی طالب (رض) کے ہاں رات گزاری تو میں نے انھیں تہجد میں قراءت کرتے سنا، جب وہ اس آیت پر پہنچے { أَفَرَأَیْتُمْ مَا تُمْنُونَ ئَ أَنْتُمْ تَخْلُقُونَہُ أَمْ نَحْنُ الْخَالِقُونَ } [الواقعہ : ٥٨۔ ٥٩] ” اچھا پھر یہ تو بتلاؤ کہ جو پانی تم ٹپکاتے ہو۔ کیا اس کا انسان تم بناتے ہو یا پیدا کرنے والے ہم ہیں ؟ “ تو فرمایا ” بل انت یا رب “ بلکہ اے اللہ تو ہی خالق ہے۔ تین مرتبہ کہا۔ پھر پڑھا : { أَفَرَأَیْتُمْ مَا تَحْرُثُونَ ئَأَنْتُمْ تَزْرَعُونَہُ أَمْ نَحْنُ الزَّارِعُونَ } [الواقعۃ : ٦٣۔ ٦٤] پھر انھوں نے دو بار کہا ” بل انت یا رب۔ “ اے میرے رب ! بلکہ تو ہی ہے، پھر پڑھا : { أَفَرَأَیْتُمُ الْمَائَ الَّذِی تَشْرَبُونَ ئَ أَنْتُمْ أَنْزَلْتُمُوہُ مِنَ الْمُزْنِ أَمْ نَحْنُ الْمُنْزِلُونَ } [الواقعۃ : ٦٨۔ ٦٩] ” اچھا یہ بتاؤ جس پانی کو تم پیتے ہو اسے بادلوں سے بھی تم ہی اتارتے ہو یا ہم برساتے ہیں ؟ “
انہوں نے تین بار کہا بل انت یا رب، اے میرے پروردگار ! تو ہی تو ہے۔ پھر پڑھتے : ا { أَفَرَأَیْتُمُ النَّارَ الَّتِی تُورُونَ ئَ أَنْتُمْ أَنْشَأْتُمْ شَجَرَتَہَا أَمْ نَحْنُ الْمُنْشِئُونَ } ” اچھا ذرا یہ تو بتاؤ کہ جو آگ تم سلگاتے ہو۔ اس کے درخت کو تم نے پیدا کیا ہے یا ہم اس کے پیدا کرنے والے ہیں۔ “ انھوں نے تین بار کہا : ” بل انت یا رب “ اللہ تو ہی یہ سب کچھ کرنے والا ہے۔