Sunan Al Bayhaqi: Hadith 3770

(٣٧٧٠) (ا) حضرت عطاء بن یسار (رض) فرماتے ہیں کہ مجھے یہ بات پہنچی ہے کہ ایک شخص نے آیت سجدہ رسول اللہ (صلی اللہ علیہ وآلہ وسلم) کے پاس تلاوت کی اور سجدہ کیا تو نبی (صلی اللہ علیہ وآلہ وسلم) نے بھی اس کے ساتھ سجدہ کیا۔ پھر کسی دوسرے شخص نے آیت سجدہ تلاوت کی اور وہ بھی نبی (صلی اللہ علیہ وآلہ وسلم) کے پاس تھا، وہ نبی (صلی اللہ علیہ وآلہ وسلم) کے سجدے کا انتظار کرتا رہا مگر آپ (صلی اللہ علیہ وآلہ وسلم) نے سجدہ نہیں کیا تو اس نے عرض کیا : اے اللہ کے رسول (صلی اللہ علیہ وآلہ وسلم) ! میں نے آیت سجدہ تلاوت کی اور آپ (صلی اللہ علیہ وآلہ وسلم) نے سجدہ نہیں کیا ؟ تو رسول اللہ (صلی اللہ علیہ وآلہ وسلم) نے فرمایا : تو امام تھا اگر تو سجدہ کرتا تو میں بھی تیرے ساتھ سجدہ کرلیتا۔
(ب) حضرت امام شافعی (رح) نے بھی یہ روایت نقل کی اور فرمایا : میرا خیال یہ ہے کہ وہ حضرت زید بن ثابت (رض) تھے کیونکہ وہی روایت کرتے ہیں کہ انھوں نے نبی (صلی اللہ علیہ وآلہ وسلم) کے پاس تلاوت کی تو آپ (صلی اللہ علیہ وآلہ وسلم) نے سجدہ نہیں کیا اور اس لیے بھی کہ دونوں حدیثوں کو روایت کرنے والے حضرت عطاء بن یسار (رض) ہی ہیں۔
(ج) حضرت امام بیہقی (رح) فرماتے ہیں کہ امام شافعی (رح) نے جو بات ذکر کی ہے یہ بھی درست ہوسکتی ہے۔