Sunan Al Bayhaqi: Hadith 3789

(٣٧٨٩) (ا) سیدنا ابن جریج (رح) بیان کرتے ہیں کہ میں نے حضرت عطاء (رح) سے کہا : کیا تم نے سیدنا ابن عباس (رض) کو یہ فرماتے ہوئے سنا ہے کہ ” تمہیں صرف خانہ کعبہ کا طواف کرنے کا حکم دیا گیا ہے نہ کہ اس کے اندر داخل ہونے کا ؟ تو انھوں نے بتایا کہ وہ داخل ہونے سے تو نہیں روکتے تھے لیکن میں نے انھیں یہ فرماتے ہوئے سنا ہے کہ مجھے حضرت اسامہ بن زید (رض) نے خبر دی کہ نبی (صلی اللہ علیہ وآلہ وسلم) جب بیت اللہ میں داخل ہوئے تو اس کے چاروں کونوں میں دعا کی اور اس کے اندر نماز نہیں پڑھی اور نکل گئے، پھر باہر جا کر بیت اللہ کے سامنے دو رکعتیں ادا کیں اور فرمایا : یہ ہے قبلہ میں نے کہا : اس کی جوانب کونسی ہیں کیا اس کے کنارے مراد ہیں ؟ انھوں نے بتایا : بیت اللہ کی ہر سمت قبلہ ہے۔
(ب) امام شافعی (رح) بیان کرتے ہیں : جو کہتا ہے کہ آپ (صلی اللہ علیہ وآلہ وسلم) نے نماز پڑھی وہ خود اس کا گواہ ہے اور جو کہتا ہے کہ آپ (صلی اللہ علیہ وآلہ وسلم) نے نہیں پڑھی اس نے آپ (صلی اللہ علیہ وآلہ وسلم) کو پڑھتے نہیں دیکھا اور ہم حضرت بلال (رض) کا قول لیں گے اور وہی ہمارے نزدیک حجت ہے۔
(ج) امام بیہقی (رح) فرماتے ہیں : اسی طرح کی روایت حضرت عمر بن خطاب (رض) کے واسطے سے بھی ہمیں پہنچی ہے۔
(د) اور یہ حضرت شیبہ بن عثمان بن طلحہ اور عثمان بن طلحہ حجبی (رض) سے بھی منقول ہے۔