Sunan Al Bayhaqi: Hadith 6360

(٦٣٦٠) اسماء بنت أبی بکر (رض) فرماتی ہیں : نبی (صلی اللہ علیہ وآلہ وسلم) کے دور میں سورج گرہن ہوا تو میں حضرت عائشہ (رض) کے پاس آئی، وہ نماز پڑھ رہی تھیں۔ میں نے کہا : لوگوں کی کیا حالت ہے کہ وہ نماز پڑھ رہے ہیں ؟ حضرت عائشہ (رض) نے اپنے سر کے ذریعے آسمان کی طرف اشارہ کیا۔ میں نے کہا : یہ نشانی ہے ؟ کہنے لگیں : ہاں۔ رسول اللہ (صلی اللہ علیہ وآلہ وسلم) نے بہت طویل قیام کیا، یہاں تک کہ مجھ پر غشی طاری ہوگئی۔ میں نے ایک چھوٹا مشکیزہ اپنے پہلو میں رکھا اور سر پر پانی ڈالنے لگی۔ نبی (صلی اللہ علیہ وآلہ وسلم) نماز سے فارغ ہوئے تو سورج روشن ہوچکا تھا، نبی (صلی اللہ علیہ وآلہ وسلم) نے لوگوں کو خطبہ ارشاد فرمایا، اللہ کی حمد وثنا بیان کی پھر فرمایا : جس چیز کا بھی تمہیں وعدہ کیا گیا تھا میں نے اس کو اپنی اس جگہ پر دیکھ لیا، یہاں تک کہ جنت اور جہنم بھی۔ پھر آپ (صلی اللہ علیہ وآلہ وسلم) نے فرمایا : میری طرف وحی کی گئی ہے کہ تم قبروں میں مسیح دِ جال کے فتنے کی طرح آزمائے جاؤ گے میں نہیں جانتا یہ کیا ہے ! اسماء (رض) فرماتی ہیں : تمہارے پاس کسی صاحب کو لایا جائے گا اور اس کے بارے میں کہا جائے گا کہ اس کو جانتے ہو ؟ مومن اور یقین رکھنے والا کہے گا کہ وہ محمد (صلی اللہ علیہ وآلہ وسلم) ہیں، اللہ کے رسول ہیں وہ ہمارے پاس واضح دلائل اور ہدایت لے کر آئی تھے تو ہم نے ان کی بات کو قبول کیا اور ان کی اطاعت کی، ایسا تین بار کہے گا۔ پھر اس مومن سے کہا جائے گا کہ ہم جانتے تھے کہ تو اس پر ایمان رکھتا ہے تو آرام سے سوجا اور منافق یا شکی آدمی کہے گا، میں نہیں جانتا یہ کون ہے ؟ اسماء فرماتی ہیں کہ وہ بندہ (منافق) کہے گا میں نے نہیں جانتا، میں لوگوں سے سنتا تھا کہ وہ کچھ کہتے ہیں تو میں نے بھی کہہ دیا۔