Sunan Al Bayhaqi: Hadith 8050

(٨٠٤٧) حضرت ابوہریرہ (رض) فرماتے ہیں کہ ہم رسول اللہ (صلی اللہ علیہ وآلہ وسلم) کے پاس بیٹھے تھے کہ ایک آدمی آیا اور اس نے کہا : اللہ کے رسول ! میں ہلاک ہوگیا ، آپ (صلی اللہ علیہ وآلہ وسلم) نے اسے فرمایا : کیا ہوا ؟ اس نے کہا : روزے کی حالت میں میں اپنی بیوی پر واقع ہوگیا۔ آپ (صلی اللہ علیہ وآلہ وسلم) نے فرمایا : کیا تو غلام رکھتا ہے کہ اسے آزاد کر دے ؟ اس نے کہا : نہیں تو آپ (صلی اللہ علیہ وآلہ وسلم) نے فرمایا : کیا تو دو مہینے کے متواتر روزے رکھنے کی استطاعت رکھتا ہے ؟ اس نے کہا : نہیں، آپ (صلی اللہ علیہ وآلہ وسلم) نے فرمایا : کیا ساٹھ مسکینوں کو کھانا کھلانے کی گنجائش ہے ؟ اس نے کہا : نہیں تو آپ (صلی اللہ علیہ وآلہ وسلم) خاموش ہوگئے ۔ ابوہریرہ (رض) فرماتے ہیں : ہم ابھی آپ (صلی اللہ علیہ وآلہ وسلم) کے پاس ہی تھے کہ آپ (صلی اللہ علیہ وآلہ وسلم) کے پاس ایک کھجوروں کا ٹوکرا لایا گیا تو آپ (صلی اللہ علیہ وآلہ وسلم) نے اسے کہا : یہ لے لو اور صدقہ کردے۔ اس نے کہا : اے اللہ کے رسول ! مجھ سے زیادہ محتاج کون ہے ؟ اللہ کی قسم ! ان دونوں پہاڑوں کے درمیان میرے اہل سے زیادہ محتاج کوئی نہیں۔ راوی کہتے ہیں : آپ (صلی اللہ علیہ وآلہ وسلم) مسکرادیے اور آپ (صلی اللہ علیہ وآلہ وسلم) کی داڑھیں ظاہر ہوگئیں اور فرمایا : جا اپنے اہل کو کھلادے۔