Sunan Al Bayhaqi: Hadith 8758

(٨٧٥٥) یحییٰ بن یعمر فرماتے ہیں کہ میں نے ابن عمر (رض) سے کہا : اے ابوعبدالرحمن ! کچھ لوگ سمجھتے ہیں کہ تقدیر نہیں ہے، کہنے لگے : کیا ان میں سے کوئی ہمارے پاس ہے ؟ میں نے کہا کہ نہیں ! تو فرمایا کہ ان کو میری طرف سے یہ پیغام دینا ، جب بھی تم ان سے ملنا کہ ابن عمر تم سے اللہ کی طرف سے بری ہے اور تم اس سے بری ہو۔ میں نے عمر بن خطاب (رض) کو یہ فرماتے ہوئے سنا کہ ہم رسول اللہ (صلی اللہ علیہ وآلہ وسلم) کے پاس بیٹھے ہوئے تھے کہ ایک شخص آیا، اس پر سفر کے اثرات نہ تھے۔ اور نہ ہی وہ اہل علاقہ میں سے تھا، حتیٰ کہ رسول اللہ (صلی اللہ علیہ وآلہ وسلم) کے سامنے بیٹھ گیا، جس طرح ہم نماز میں بیٹھتے ہیں، پھر اس نے اپنے ہاتھ رسول اللہ (صلی اللہ علیہ وآلہ وسلم) کے گھٹنوں پر رکھے اور پوچھا : اے محمد (صلی اللہ علیہ وآلہ وسلم) ! اسلام کیا ہے ؟ تو آپ (صلی اللہ علیہ وآلہ وسلم) نے فرمایا : اللہ تعالیٰ کے اکیلے معبود ہونے اور محمد (صلی اللہ علیہ وآلہ وسلم) کے رسول ہونے کی گواہی دینا ، نماز قائم کرنا، زکوٰۃ ادا کرنا، بیت اللہ کا حج کرنا اور عمرہ کرنا، غسلِ جنابت کرنا ، وضو مکمل کرنا اور رمضان کے روزے رکھنا۔ اس نے کہا : اگر میں یہ کروں تو کیا میں مسلمان ہوں ؟ آپ نے فرمایا : ہاں ! پھر اس نے کہا : آپ (صلی اللہ علیہ وآلہ وسلم) نے سچ فرمایا ہے، (اور ساری حدیث ذکر کی)