(١٠٤٢) سیدنا ابو قلابہ بنی عامر قبیلے کے ایک شخص سے نقل فرماتے ہیں کہ میں اسلام میں داخل ہوا تو میرے دین نے مجھے فکر میں ڈال دیا، میں ابو ذر (رض) کے پاس آیا۔ ابو ذر (رض) نے کہا : مدینہ کی آب وہوا کو میں نے اپنے لیے ناموافق پایا، مجھ کو رسول اللہ (صلی اللہ علیہ وآلہ وسلم) نے اونٹ اور بکریوں کا حکم دیا اور آپ (صلی اللہ علیہ وآلہ وسلم) نے فرمایا : ان کا پیشاب پی۔ حماد کہتے ہیں : مجھے شک ہے کہ اس میں پیشاب کا بیان ہے یا نہیں ۔ ابوذر (رض) نے کہا : میں پانی سے دور تھا اور میرے ساتھ میری بیوی تھی میں جنبی ہوگیا تو میں نے بغیر وضو کے نماز پڑھ لی، میں دوپہر کو نبی (صلی اللہ علیہ وآلہ وسلم) کے پاس آیا اور آپ (صلی اللہ علیہ وآلہ وسلم) صحابہ کے ساتھ مسجد کے سایہ میں تشریف فرما تھے، آپ (صلی اللہ علیہ وآلہ وسلم) نے فرمایا : ابو ذر ! میں نے کہا : جی اے اللہ کے رسول ! میں ہلاک ہوگیا، آپ (صلی اللہ علیہ وآلہ وسلم) نے فرمایا : کس چیز نے تجھے ہلاک کردیا ؟ میں نے کہا : میں پانی سے دور تھا اور میری بیوی میرے ساتھ تھی، میں جنبی ہوگیا ۔ میں نے بغیر وضو کے نماز پڑھ لی۔ رسول اللہ (صلی اللہ علیہ وآلہ وسلم) نے میرے لیے پانی لانے کا حکم دیا، سیاہ رنگ کی لونڈی برتن لے کر آئی جس میں پانی چھلک رہا تھا۔ میں نے اونٹ کی اوٹ میں پردہ کیا اور غسل کیا، پھر میں آیا، رسول اللہ (صلی اللہ علیہ وآلہ وسلم) نے فرمایا : اے ابو ذر ! پاک مٹی پاک کرنے والی ہے اگرچہ تجھے دس سال بھی پانی نہ ملے۔ جب پانی مل جائے تو اپنی جسمپر ڈالو۔