(١٠٩٦٣) محمد بن جحش فرماتے ہیں کہ ہم ایک دن آپ (صلی اللہ علیہ وآلہ وسلم) کے ساتھ جنازگاہ میں تشریف فرما تھے، آپ (صلی اللہ علیہ وآلہ وسلم) نے اپنا سر آسمان کی طرف اٹھا کر اپنی ہتھیلیوں کو اپنے منہ پر رکھ لیا اور فرمایا : اللہ پاک ہے ، اللہ نے آسمان سے کیا سختی نازل فرمائی ہے ؟ ہم خاموش رہے اور جدا جدا ہوگئے، جب صبح ہوئی تو میں نے رسول اللہ (صلی اللہ علیہ وآلہ وسلم) سے پوچھا : اے اللہ کے رسول (صلی اللہ علیہ وآلہ وسلم) ! جو سختی نازل ہوئی وہ کیا تھی ؟ فرمایا : قرض کے بارے میں۔ اس ذات کی قسم جس کے ہاتھ میں میری جان ہے اگر آدمی اللہ کے راستہ میں شہید کردیا جائے پھر زندہ کردیا جائے، پھر شہید کردیا جائے اور اس پر قرض ہو تو اتنی دیر وہ جنت میں داخل نہ ہوگا جب تک اس کا قرض معاف نہ کردیا جائے۔