(١١١٢٢) ابو مجاہد فرماتے ہیں کہ مجھے ابو بردہ اور عبدالرحمن بن شداد (رض) نے ابن ابی اوفیٰ کے پاس بھیجا کہ میں جاکر پوچھوں : کیا تم رسول اللہ (صلی اللہ علیہ وآلہ وسلم) کے زمانے میں گندم ، جو، کش مش میں بیع سلف کرتے تھے ؟ میں نے جاکر پوچھا تو انھوں نے جواب دیا : ہم شام کے قبطیوں سے جو گندم اور کشمش میں معلوم وزن میں مدت مقررہ میں بیع سلم کیا کرتے تھے، میں نے پوچھا : جن کی کھیتی ہوتی تھی ان سے بیع کرتے تھے ؟ کہنے لگے : ہم ان سے اس بارے میں نہیں پوچھتے تھے۔ ابو مجاہد کہتے ہیں کہ پھر ان دونوں نے مجھے عبداللہ بن ابزی کے پاس بھیجا اور کہا : ان سے پوچھیے : کیا رسول اللہ (صلی اللہ علیہ وآلہ وسلم) کے زمانے میں صحابہ کرام گندم ، جو اور کشمش میں بیع سلم کیا کرتے تھے ؟ تو اس نے کہا : جی ! جب وزن، مقدار اور مدت معلوم ہوتی تب کیا کرتے تھے اور وہ یہ نہیں پوچھتے تھے کہ تمہارے پاس کھیتی اگ گئی ہے یا نہیں ۔