حضرت جابر بن عبداللہ (رض) فرماتے ہیں : حضرت معاذ بن جبل (رض) ، نرم خو اور سخی تھے، ان پر بہت زیادہ قرضہ چڑھ گیا۔ قرض خواہ ان کے پیچھے پڑگئے۔ وہ لوگوں سے چھپ کر کئی دن اپنے گھر میں ٹھہرے رہے۔ قرض خواہوں نے رسول اللہ (صلی اللہ علیہ وآلہ وسلم) سے اسے بلوانے کا مطالبہ کردیا۔ آپ نے ان کی طرف پیغام بھیجا تو وہ آئے اور قرض خواہ ان کے ساتھ تھے۔ وہ کہنے لگے : اے اللہ کے رسول ! ہمیں اس سے ہمارا حق دلوائیے ! رسول اللہ (صلی اللہ علیہ وآلہ وسلم) نے فرمایا : جو اس پر صدقہ کرے گا اللہ اس پر رحم فرمائے گا۔ چند لوگوں نے صدقہ کیا اور کچھ نے انکار کردیا اور برابر مطالبہ کرتے رہے۔ آپ (صلی اللہ علیہ وآلہ وسلم) نے فرمایا : اے معاذ ! ان کا حق پورا کرو۔ پھر رسول اللہ (صلی اللہ علیہ وآلہ وسلم) نے ان کے مال سے قرض خواہوں کا حق ادا کردیا۔ جو انھوں نے آپس میں تقسیم کرلیا۔ پھر بھی ان کے حق کا ٧٥ فی صد باقی تھا وہ کہنے لگے : اسے ہمارے ہاتھ بیچ دیجیے۔ آپ (صلی اللہ علیہ وآلہ وسلم) نے فرمایا : اسے چھوڑ دو ، تمہیں اس کا کوئی حق نہیں۔ واقدی بعض الفاظ میں متفرد ہیں۔