(١١٢٧٥) زید بن اسلم فرماتے ہیں : میں نے اسکندریہ میں ایک ضعیف العمر شخص کو دیکھا جسے ” سرَّق “ کہا جاتا تھا۔ میں نے اس سے کہا : یہ کیسا نام ہے ؟ اس نے کہا : یہ میرا نام رسول اللہ (صلی اللہ علیہ وآلہ وسلم) نے رکھا تھا۔ جسے میں ہرگز ترک نہیں کروں گا۔ اس نے کہا : میں مدینہ میں آیا تو میں نے لوگوں کو کہا : میرا مال آرہا ہے تو انھوں نے میرے ساتھ بیع کی، میں نے ان کا مال سارے کا سارا خرچ کر ڈالا۔ وہ مجھے نبی (صلی اللہ علیہ وآلہ وسلم) کے پاس لے گئے تو آپ نے فرمایا : ” انت سرق “ تو چور ہے ! پھر آپ نے مجھے چار اونٹوں کے عوض بیچ دیا۔ میرے قرض خواہوں نے مجھے خریدنے والے سے پوچھا : تم اس کا کیا کرو گے ؟ تو اس نے کہا : میں اسے آزاد کروں گا تو وہ کہنے لگے : ہم تیری نسبت ثواب کے زیاد ہ محتاج ہیں، پھر انھوں نے مجھے آزاد کردیا اور میرا نام باقی رہ گیا۔ اسی معنی کی ایک روایت اور ہے۔ عبدالرحمن اور عبداللہ اپنے والدزید بن اسلم سے روایت کرتے ہیں جو مذکورہ حدیث سے مکمل ہے۔ اس میں ہے کہ اعرابی نے پھر اونٹنی خرید ی اور اس کی قیمت خرچ کر گیا۔ اسے امام مسلم نے اپنی سند سے روایت کیا ہے۔ امام احمد فرماتے ہیں کہ اس روایت کو ہمارے شیخ امام حاکم نے المستدرک میں بیان کیا ہے۔ اس میں ہے کہ عبدالرحمن بن بیلمانی کہتے ہیں : میں نے اسکندریہ میں ایک بوڑھا دیکھا ۔۔۔ مذکورہ ابن بشار کی حدیث سے مکمل بیان کی۔ یہ حدیث ضعیف ہے؛ کیونکہ سند میں اکثر راوی ضعیف ہیں۔