(١١٦٢٦) حضرت ابن عمر (رض) سے روایت ہے کہ نبی (صلی اللہ علیہ وآلہ وسلم) نے اہل خیبر سے لڑائی کی یہاں تک کہ ان کو ایک قلعے کی طرف قید کردیا۔ زمین اور باغات پر فتح پا لی۔ انھوں نے کہا : اے محمد ! ہمیں یہیں رہنے دیا جائے۔ ہم ان باغات کی دیکھ بھال کریں گے اور نبی (صلی اللہ علیہ وآلہ وسلم) اور صحابہ کے پاس بھی خدام نہ تھے جو وہاں رہتے۔ نبی (صلی اللہ علیہ وآلہ وسلم) نے خیبر ان کو دے دیا اس شرط پر کہ وہ پھلوں ، اناج یا جو بھی چیز ہوگی اس کا نصف دیں گے اور عبداللہ بن رواحہ ہر سال ان کے پاس جاتے۔ اندازہ لگاتے پھر نصف ان پر لازم کردیتے۔ انھوں نے ایک سال ابن رواحہ کے سختی کے ساتھ فرص لگانے کی شکایت رسول اللہ (صلی اللہ علیہ وآلہ وسلم) سے کی اور انھوں نے رشوت دینے کا ارادہ کیا۔ آپ نے کہا : اے اللہ کے دشمنو ! تم مجھے حرام کھلانا چاہتے ہو، حالانکہ میں نے تمہاری طرف بہترین آدمی کو بھیجا ہے اور تم خنزیر اور بندر سے بھی زیادہ بغض والے ہو۔ میرے نزدیک تمہارا بغض اور اس کی محبت مجھے اس بات پر مجبور نہ کرے گی کہ میں تمہارے ساتھ عدل نہ کروں۔ پھر انھوں نے کہا : اسی عدل کی وجہ سے آسمان اور زمین قائم ہے۔