(١١٦٦٠) ابو امامۃ النجی فرماتے ہیں : میں حج میں کرایہ پر جانور دیتا تھا اور لوگ کہتے تھے : تیرا حج نہیں ہے۔ میں حضرت ابن عمر (رض) سے ملا اور کہا : اے ابو عبدالرحمن ! میں کرایہ پر جانور دیتا ہوں اور لوگ کہتے ہیں : میرا حج نہیں ہے تو ابن عمر (رض) نے کہا : کیا تو نے احرام نہیں باندھا ؟ اور تلبیہ نہیں پکارا اور بیت اللہ کا طواف نہیں کیا اور عرفات سے نہیں لوٹا اور تو نے رمئی حجار نہیں کی ؟ ابو امامۃ فرماتے ہیں : میں نے جواب دیا : کیوں نہیں، میں نے سارے کام کیے ہیں تو ابن عمر (رض) نے کہا : تیرا حج درست ہے۔ (پھر فرمایا) ایک آدمی رسول اللہ (صلی اللہ علیہ وآلہ وسلم) کے پاس آیا اور اسی طرح سوال کیا جس طرح تو نے کیا ہے، آپ (صلی اللہ علیہ وآلہ وسلم) خاموش رہے، آپ (صلی اللہ علیہ وآلہ وسلم) نے کوئی جواب نہ دیا یہاں تک کہ یہ آیت نازل ہوئی : { لَیْسَ عَلَیْکُمْ جُنَاحٌ أَنْ تَبْتَغُوا فَضْلاً مِنْ رَبِّکُمْ } تم پر کوئی گناہ نہیں کہ تم اللہ کا فضل تلاش کرو۔
پھر آپ (صلی اللہ علیہ وآلہ وسلم) نے اس آدمی کو بلایا اور اس کے سامنے یہ آیت پڑھی، پھر فرمایا : تیرا حج درست ہے۔