(١١٩١٩) حضرت ابن عباس (رض) سے روایت ہے کہ نبی (صلی اللہ علیہ وآلہ وسلم) نے حج کا ارادہ کیا۔ ایک عورت نے اپنے خاوند سے کہا : مجھے بھی نبی (صلی اللہ علیہ وآلہ وسلم) کے ساتھ حج کراؤ۔ اس نے کہا : میرے پاس کچھ نہیں جس کے ساتھ میں حج کراؤں۔ عورت نے کہا : فلاں اونٹ پر حج کراؤ۔ اس نے کہا : وہ اللہ کے راستے کے لیے روکا ہوا ہے۔ عورت نے کہا : اپنے اونٹ پر کروا دو ۔ اس نے کہا : میں اور تیرا بیٹا اس کے ساتھ کام وغیرہ کرتے ہیں، عورت نے کہا : اپنا پھل بیچ دو ، اس نے کہا : وہ میرا اور تیرا کھانا ہے، جب نبی (صلی اللہ علیہ وآلہ وسلم) آئے تو اس نے اپنے خاوند کو نبی (صلی اللہ علیہ وآلہ وسلم) کے پاس بھیجا اور کہا : سلام کہنا اور ساتھ حج کرنے کے لیے کوئی چیز مانگنا۔ اس کا خاوند نبی (صلی اللہ علیہ وآلہ وسلم) کے پاس آیا اور اس نے کہا : میری بیوی نے آپ کو سلام کہا ہے اور اس نے مجھ سے حج کے لیے سواری مانگی ہے۔ میں نے کہا : میرے پاس کچھ نہیں ہے، جس سے تجھے حج کراؤں۔ اس نے کہا : فلاں اونٹ پر حج کراؤ۔ میں نے کہا : وہ اللہ کے راستے میں روکا ہوا ہے، نبی (صلی اللہ علیہ وآلہ وسلم) نے کہا : اگر تو اس کو اس اونٹ پر حج کرا دے تو یہ بھی اللہ کا راستہ ہی ہے، اس عورت نے کہا : مجھے اپنے اونٹ پر حج کروا، میں نے کہا : اس سے میں اور تیرا بیٹا کام وغیرہ کرتے ہیں۔ اس نے کہا : اپنا پھل بیچو۔ نبی (صلی اللہ علیہ وآلہ وسلم) حج پر اس کی حرص سن کر ہنسے، اس آدمی نے کہا : میری بیوی نے کہا ہے کہ میں آپ (صلی اللہ علیہ وآلہ وسلم) سے سواری مانگوں ساتھ حج کرنے کے لیے آپ (صلی اللہ علیہ وآلہ وسلم) نے کہا : اسے سلام کہنا اور اسے خبر دینا کہ رمضان میں عمرہ حج کے برابر ہوتا ہے۔