(١١٩٢٨) عاصم بن بہد فرماتے ہیں کہ وہ سب حجاج کے پاس جمع ہوئے ۔ حسین بن علی (رض) کا ذکر کیا گیا، حجاج نے کہا : وہ نبی (صلی اللہ علیہ وآلہ وسلم) کی ذریت نہیں ہیں، یحییٰ بن یعمر بھی پاس تھے۔ انھوں نے حجاج سے کہا : اے امیر ! آپ نے جھوٹ بولا ہے، حجاج نے کہا : جو تو نے کہا ہے اس کی سچائی کے لیے کتاب اللہ سے دلیل لا ورنہ تجھے قتل کر دوں گا۔ یحییٰ نے کہا : { وَمِنْ ذُرِّیَّتِہِ دَاوُدَ وَسُلَیْمَانَ وَأَیُّوبَ وَیُوسُفَ وَمُوسَی وَہَارُونَ } إِلَی قَوْلِہِ { وَزَکَرِیَّا وَیَحْیَی وَعِیسَی } (الانعام : ٨٤) ” اللہ تعالیٰ نے خبر دی کہ عیسیٰ آدم کی ذریت ہیں، اپنی ماں کے ساتھ اور حسین بن علی محمد کی ذریت ہیں اپنی ماں (فاطمہ) کے ساتھ، حجاج نے کہا : تو نے سچ کہا، لیکن میری مجلس میں میری تکذیب پر تجھے کسی چیز نے ابھارا ہے ؟ یحییٰ نے کہا : اللہ نے انبیاء پر جو وعدہ لیا ہے اس نے ابھارا۔ { لَتُبَیِّنُنَّہُ لِلنَّاسِ وَلاَ تَکْتُمُونَہُ } تم لوگوں کے لیے اس کو واضح کرو گے اور اسے نہ چھپاؤ گے۔ پس انھوں نے پشت کے پیچھے ڈال دیا اور اسے تھوڑی قیمت کے بدلے بیچ ڈالا۔ حجاج نے یحییٰ کو خراسان کی طرف برطرف کردیا۔