(١٢٢١٨) سعید بن مسیب (رح) نے فرمایا کہ ابن دحداح تھوڑی دیر ٹھہرے، یہاں تک کہ قریش کے کفار آگئے احد کے دن۔ وہ بھی رسول اللہ (صلی اللہ علیہ وآلہ وسلم) کے ساتھ نکلے، ان سے لڑے اور شہید کردیے گئے۔
امام شافعی (رح) نے فرمایا : فرائض کی آیت محمود بن سلمہ کی بیٹیوں کے بارے میں نازل ہوئی، وہ خیبر کے دن فوت ہوگئے تھے اور یہ بھی کہا گیا ہے کہ احد کے بعد سعد بن ربیع کی بیٹیوں کے بارے نازل ہوئی۔ یہ سب ثابت بن دحداح کے معاملے کے بعد کی باتیں ہیں۔
شیخ (رح) فرماتے ہیں : حدیث جابر بن عبداللہ (رض) جو ہم نے ذکر کی ہے ان کا نبی (صلی اللہ علیہ وآلہ وسلم) سے کہنا کہ کلالہ میرا وارث بنا ہے، پس میراث کیسے تقسیم ہوگی تو آیت فرائض نازل ہوئی، یہ اس پر دلالت کرتی ہے کہ آیت فرائض احد کے بعد نازل ہوئی۔ اس لیے کہ احد سے پہلے اس کے والدزندہ تھے اور احد کے دن وہ شہید کردیے گئے اور انھوں نے جابر اور اپنی بیٹیوں کو چھوڑا تھا، جب جابر (رض) بیمار ہوئے تو ان کی بہنیں تھیں، نہ ان کے باپ تھے اور نہ اولاد تو کہا : میں نے کلالہ کو وارث بنایا ہے، پس آیت فرائض نازل ہوئی اور یہ بھی کہا گیا ہے کہ ان کے بارے میں وہ آیت فرائض نازل ہوئی جو سورة النساء کے آخر میں ہے اور وہ آیت فرائض جو شروع میں ہے وہ سعد بن ربیع کی بیٹیوں کے بارے میں نازل ہوئی جیسا کہ امام شافعی (رح) نے فرمایا۔