(١٢٣٧٧) حکیم بن عقال فرماتے ہیں : شریح کو ایسی عورت کے پاس لایا گیا جس نے اپنے چچا کے دو بیٹے چھوڑے تھے۔ ان میں سے ایک اس کا خاوند تھا اور دوسرا اس کا اخیافی بھائی تھا تو شریح نے خاوند کو نصف دیا اور باقی اخیافی بھائی کو دے دیا۔ حضرت علی (رض) کو یہ بات پہنچی تو انھوں نے شریح کو بلایا اور کہا : آپ نے کیا فیصلہ کیا ؟ شریح نے کہا : میں نے خاوند کو نصف دیا ہے اور اخیافی بھائی کو باقی ماندہ دیا ہے۔ حضرت علی (رض) نے کہا : کتاب اللہ کے ساتھ یہ فیصلہ کیا ہے یا سنت رسول اللہ (صلی اللہ علیہ وآلہ وسلم) سے ؟ شریح نے کہا : کتاب اللہ کے ساتھ، حضرت علی (رض) نے پوچھا : کہاں ؟ شریح نے { وَأُولُو الأَرْحَامِ بَعْضُہُمْ أَوْلَی بِبَعْضٍ فِی کِتَابِ اللَّہِ } حضرت علی (رض) نے کہا : زوج کے لیے نصف کہا اور باقی کس کے لیے ہے ؟ پھر حضرت علی (رض) نے زوج کو نصف دیا اور اخیافی بھائی کو سدس دیا۔ پھر باقی دونوں میں تقسیم کردیا۔