(١٢٦) (الف) حضرت عمران بن حصین (رض) کہتے ہیں کہ رسول اللہ (صلی اللہ علیہ وآلہ وسلم) اور آپ کے صحابہ ایک سفر میں گئے، انھیں سخت پیاس لگ گئی۔ آپ (صلی اللہ علیہ وآلہ وسلم) کے دو صحابی آئے۔ میرا گمان ہے کہ وہ علی (رض) اور زبیر (رض) تھے یا شاید ان کے علاوہ کوئی اور۔ آپ (صلی اللہ علیہ وآلہ وسلم) نے فرمایا : تم دونوں فلاں جگہ پر ایک عورت کو پاؤ گے اس کے پاس اونٹ ہوگا، اس پر دو مٹکے ہوں گے ۔ تم دونوں اس کو میرے پاس لاؤ۔ وہ دونوں عورت کے پاس آئے ۔ انھوں نے اس کو دیکھا وہ عورت اونٹ پر دو مٹکوں کے درمیان بیٹھی ہوئی تھی، انھوں نے اس سے کہا : آپ کو رسول اللہ (صلی اللہ علیہ وآلہ وسلم) بلا رہے ہیں، وہ کہنے لگی : کون رسول اللہ (صلی اللہ علیہ وآلہ وسلم) ؟ یہی بےدین ! (معاذ اللہ) انھوں نے کہا : وہی ہیں جو تم مراد لے رہی ہو لیکن رسول اللہ (صلی اللہ علیہ وآلہ وسلم) برحق ہیں، وہ دونوں اس کو لے کر آئے۔ رسول اللہ (صلی اللہ علیہ وآلہ وسلم) نے حکم دیا کہ مٹکوں سے پانی نکالو اور اس پر کچھ پڑھا۔ پھر پانی کو اس کے مٹکوں میں واپس لوٹا دیا۔ پھر آپ (صلی اللہ علیہ وآلہ وسلم) نے دو مشکیزوں کا حکم دیا، ان کو کھولا گیا۔ پھر آپ (صلی اللہ علیہ وآلہ وسلم) نے لوگوں کو حکم دیا، انھوں نے اپنے برتنوں اور مشکیزوں کو بھر لیا اور لوگوں نے اس دن کوئی برتن اور مشکیزہ خالی نہیں چھوڑا، ۔ عمران (رض) کہتے ہیں : مجھے خیال تھا کہ زیادہ بھر گیا ہے۔ عمران کہتے ہیں کہ نبی (صلی اللہ علیہ وآلہ وسلم) نے کپڑے کو پھیلانے کا حکم دیا، پھر آپ (صلی اللہ علیہ وآلہ وسلم) نے صحابہ کرام کو حکم دیا کہ وہ اپنا زاد راہ لے کر آئیں۔ انھوں نے زاد راہ سے کپڑے کو بھر دیا۔ پھر آپ (صلی اللہ علیہ وآلہ وسلم) نے اس عورت سے فرمایا : ” جاؤ، ہم نے آپ کے پانی میں سے کچھ نہیں لیا، لیکن اللہ تعالیٰ نے ہم کو پلا دیا ہے۔ “
عمران کہتے ہیں : وہ عورت اپنے اہل و عیال کے پاس آئی اور کہنے لگی کہ میں سب سے بڑے جادو گر کے پاس سے آئی ہوں یا پھر وہ یقیناً اللہ کے برحق رسول ہیں۔ عمران کہتے ہیں : پھر حواء بستی والے آئے اور سب مسلمان ہوگئے۔
(ب) بیشک نبی کریم (صلی اللہ علیہ وآلہ وسلم) کو ناپاک آدمی نے برتن میں پانی دیا۔ آپ (صلی اللہ علیہ وآلہ وسلم) نے فرمایا : اس کو اپنے اوپر ڈال لے اور وہ عورت کھڑی دیکھ رہی تھی جو اس کے پانی کے ساتھ کیا جا رہا تھا۔ “