(١٢٩٣٣) حضرت عمرو بن شعیب اپنے والد سے اور وہ اپنے دادا سے نقل فرماتے ہیں کہ ہم حنین میں رسول اللہ (صلی اللہ علیہ وآلہ وسلم) کے ساتھ تھے، جب بنو ہوازن کو ان کے مالوں سے اور قیدیوں سے مصیبت آئی تو ہوازن کے وفد نے نبی (صلی اللہ علیہ وآلہ وسلم) کو جعرانہ میں پا لیا اور وہ مطیع ہوچکے تھے۔ انھوں نے کہا : اے اللہ کے رسول (صلی اللہ علیہ وآلہ وسلم) ! ہمارے لیے اصل ہے اور قبیلہ ہے اور ہمیں مصیبت آئی ہے جیسا کہ آپ پر مخفی نہیں ہے، پس آپ ہم پر احسان کریں، اللہ آپ پر احسان کرے گا۔ آپ (صلی اللہ علیہ وآلہ وسلم) نے پوچھا : تمہیں تمہاری بیویاں اور اولادزیادہ محبوب ہے یا تمہارا مال ؟ تو انھوں نے کہا۔ آپ نے ہمیں ہماری یعنی عورتوں اور مالوں میں اختیار دیا ہے تو ہماری اولاد اور ہماری بیویاں ہمیں زیادہ محبوب ہیں۔ رسول اللہ (صلی اللہ علیہ وآلہ وسلم) نے فرمایا : جس قدر چرا اور بنی عبدالمطلب کا حصہ ہے تو وہ میں تم کو دے چکا ہوں اور جب میں لوگوں کو نماز پڑھاؤں تو تم کھڑے ہوجانا اور کہنا کہ ہم رسول اللہ (صلی اللہ علیہ وآلہ وسلم) کے سبب مدد چاہتے ہیں، مسلمانوں سے اپنی اولاد اور اپنی عورتوں کے بارے میں۔ پس میں تم کو اس وقت دے دوں گا اور میں تمہارے لیے سوال کروں گا۔ جب رسول اللہ (صلی اللہ علیہ وآلہ وسلم) نے لوگوں کو ظہر کی نماز پڑھائی وہ کھڑے ہوئے۔ انھوں نے کہا : جو رسول اللہ (صلی اللہ علیہ وآلہ وسلم) نے ان کو حکم دیا تھا۔ رسول اللہ (صلی اللہ علیہ وآلہ وسلم) نے فرمایا : جو میرا اور بنی عبدالمطلب کا حصہ ہے وہ تمہارے لیے ہے۔ یہ سن کر مہاجروں نے بھی کہا، ہمارے حصے بھی رسول اللہ (صلی اللہ علیہ وآلہ وسلم) کے لیے ہیں۔ انصار نے کہا : ہمارے حصے بھی رسول اللہ (صلی اللہ علیہ وآلہ وسلم) کے لیے ہیں۔ اقرع بن حابس نے کہا : میں اور بنو تمیم اس میں شامل نہیں۔ عباس بن مرداس نے کہا میں اور بنو سلیم بھی اس میں شامل نہیں ہیں۔ بنو سلیم نے کہا : ہمارے حصے بھی رسول اللہ (صلی اللہ علیہ وآلہ وسلم) کے لیے ہیں۔ عیینہ بن بدر نے کہا : میں اور بنو فزارہ اس میں شامل نہیں ہیں۔ رسول اللہ (صلی اللہ علیہ وآلہ وسلم) نے فرمایا : جس نے تم میں سے اپنا حق روکا ہے بس اس کے لیے چھ اونٹ ہیں، پہلے مال فئی میں۔ ہم اس کو اس کا حصہ دیں گے۔ پس ان لوگوں کو ان کی عورتیں اور اولاد لوٹا دو ۔ پھر رسول اللہ (صلی اللہ علیہ وآلہ وسلم) سوار ہوئے اور لوگ بھی آپ (صلی اللہ علیہ وآلہ وسلم) کے پیچھے تھے۔ وہ کہنے لگے : اے اللہ کے رسول ! ہمارے لیے ہمارا مال تقسیم کردیں، یہاں تک آپ (صلی اللہ علیہ وآلہ وسلم) کو گھیر کر ایک درخت کی طرف لے گئے، آپ (صلی اللہ علیہ وآلہ وسلم) کی چادر آپ سے الگ ہوگئی۔ رسول اللہ (صلی اللہ علیہ وآلہ وسلم) نے فرمایا : اے لوگو ! میری چادر مجھ پر لوٹاؤ۔ اس ذات کی قسم جس کے ہاتھ میں میری جان ہے اگر تہامہ کے درختون کے برابر بھی جانور ہوں تو میں تم میں تقسیم کر دوں گا، پھر تم مجھے بخیل اور بزدل اور جھوٹا نہ پاؤ گے، پھر رسول اللہ (صلی اللہ علیہ وآلہ وسلم) ایک اونٹ کے پاس کھڑے ہوئے اور اس کی کوہان سے بال پکڑے۔ اس کو اپنی ہتھیلی میں رکھا اور فرمایا : اے لوگو ! تمہارے مال میں سے میرے لیے کچھ نہیں اور نہ یہ بال بھی، سوائے خمس کے اور خمس بھی تمہیں لوٹا دیا جائے گا، پھر فرمایا : اے لوگو ! سوئی، دھاگا بھی دے دو ، پس بیشک مال غنیمت میں چوری چوری کرنے والے کے لیے قیامت کے دن شرم، آگ اور ننگ ہوگی۔ انصار کا ایک آدمی ایک بالوں کا گچھے لے کر آیا، ساتھ اس نے کہا : اے اللہ کے رسول (صلی اللہ علیہ وآلہ وسلم) ! میں نے اسے درست کرنے کے لیے پکڑا تھا۔ رسول اللہ (صلی اللہ علیہ وآلہ وسلم) نے فرمایا : میرا حق بھی تیرے لیے ہے، آدمی نے کہا : جب یہ بات ہے تو مجھے کسی چیز کی ضرورت نہیں اور اسے پھینک دیا۔