(١٢٩٩٧) غفرہ عمر فرماتے ہیں : جب رسول اللہ (صلی اللہ علیہ وآلہ وسلم) فوت ہوگئے، بحرین سے مال آیا۔ ابوبکر (رض) نے کہا : جس کی رسول اللہ (صلی اللہ علیہ وآلہ وسلم) پر کوئی چیز ہو وہ لے لے، جابر بن عبداللہ (رض) کھڑے ہوئے اور کہا : رسول اللہ (صلی اللہ علیہ وآلہ وسلم) نے فرمایا تھا : اگر بحرین سے مال آیا تو میں تجھے اتنا اتنادوں گا۔ تین مرتبہ فرمایا اور اپنے ہاتھ سے مٹھی بنائی۔ پس ابوبکر (رض) نے کہا : کھڑے ہوجاؤ اور اپنے ہاتھ سے پکڑ لو۔ پس وہ پکڑے تو وہ پانچ سو تھے، ابوبکر (رض) نے کہا : ایک ہزار شمار کرو اور لوگوں میں دس دس درہم بانٹ دو اور کہا : وعدے کا وقت ہے، جو رسول اللہ (صلی اللہ علیہ وآلہ وسلم) نے لوگوں سے کیا تھا۔ حتیٰ کہ جب آئندہ سال آیا تو بہت زیادہ مال آیا، پس آپ نے بیس بیس درہم تقسیم کیے، پھر بھی اس سے درہم بچ گئے، آپ نے خادموں کو پانچ پانچ درہم دیے اور کہا : وہ تمہارے خادم ہیں اور تمہاری خدمت کرتے ہیں، تمہارا علاج کرتے ہیں، پس ہم نے ان کو انعام دیا ہے۔ انھوں نے کہا : اگر آپ مہاجرین و انصار کو سبقت اور مقام کی وجہ سے فضیلت دے دیں۔ ابوبکر (رض) نے کہا : اس کا اجر اللہ پر ہے، بیشک معاش میں اسوہ ہی ترجیح سے بہتر ہے۔ پس آپ نے اپنی خلافت میں اسی پر عمل کیا، حتیٰ کہ جب میرے خیال میں جمادی الاخری کی تیرہ راتیں باقی رہ گئیں تو وہ فوت ہوگئے، پس عمر بن خطاب (رض) والی بنے۔ آپ نے فتوحات حاصل کیں، آپ کے پاس اموال آئے، ابوبکر (رض) نے ان اموال میں اپنی رائے اختیار کی اور میری ایک رائے ہے۔ میں اس کو جو رسول اللہ (صلی اللہ علیہ وآلہ وسلم) سے لڑا ایسا نہ بناؤں گا کہ وہ رسول اللہ (صلی اللہ علیہ وآلہ وسلم) سے لڑا ہے۔ پس عمر (رض) نے مہاجرین و انصار میں سے جو بدر میں حاضر ہوئے ان کے لیے پانچ پانچ ہزار مقرر کیے اور جن کا اسلام اہل بدر کے اسلام جیسا تھا، لیکن بدر میں حاضر نہ ہوئے تھے ان کے لیے چار چار ہزار مقرر کیے اور نبی (صلی اللہ علیہ وآلہ وسلم) کی ازواج (رض) کے لیے بارہ بارہ ہزار مقرر کیے، سوائے صفیہ اور جویریہ کے ، ان کے لیے چھ چھ ہزار مقرر کیے۔ ان دونوں نے لینے سے انکار کردیا۔ عمر (رض) نے ان سے کہا : ان کو ہجرت کی وجہ سے زیادہ دیا ہے۔ دونوں نے کہا : ان کے لیے رسول اللہ (صلی اللہ علیہ وآلہ وسلم) کی وجہ سے جو مقام تھا، اس بناء پر آپ (صلی اللہ علیہ وآلہ وسلم) نے زیادہ حصہ دیا اور ہمارے لیے بھی وہی مقام ہے، پس عمر (رض) نے وہ پہچان لیا تو ان کے لیے بارہ بارہ ہزار مقرر کیے اور عباس (رض) کے لیے بارہ ہزار مقرر کیے اور اسامہ بن زید (رض) کے لیے چار ہزار اور عبداللہ بن عمر (رض) کے لیے تین ہزار۔ انھوں نے کہا : اے ابا جان اسامہ کو ایک ہزار زائد کیوں دیا، جو اس کے باپ کو فضیلت ہے، وہ میرے باپ کو نہیں ہے اور جو اس کے لیے ہے وہ میرے لیے نہیں ہے ؟ عمر (رض) نے کہا : اسامہ کے باپ رسول اللہ (صلی اللہ علیہ وآلہ وسلم) کو تیرے باپ سے زیادہ محبوب تھے، اور اسامہ رسول اللہ (صلی اللہ علیہ وآلہ وسلم) کو تجھ سے زیادہ محبوب تھے اور حسن و حسین (رض) کے لیے پانچ ہزار مقرر کیا، ان دونوں کو ان کے باپ سے ملا دیا۔ رسول اللہ (صلی اللہ علیہ وآلہ وسلم) سے مقام کی وجہ سے اور انصار و مہاجرین کی اولادوں کے لیے دو دو ہزار مقرر کیا، پس عمر بن ابی سلمہ پاس سے گزرے کہا، اسے ایک ہزار زائد دے دو ۔ محمد بن عبداللہ بن جحش نے ان سے کہا : جو اس کے باپ کا مقام تھا، وہ ہمارے باپ کا نہ تھا اور جو اس کا مقام ہے وہ ہمارا نہیں ہے۔ عمر (رض) نے کہا : میں نے اس کے لیے دو ہزار اس کے باپ ابو سلمہ کی وجہ سے اور اس کی ماں ام سلمہ کی وجہ سے ایک ہزار زائد دیا۔ اگر تیری بھی ماں اس کی ماں جیسی ہوتی تو تجھے بھی ایک ہزار زیادہ دیتا اور اہل مکہ کے لیے آٹھ سو مقرر کے، آپ کے پاس طلحہ بن عبیداللہ اپنے بھائی عثمان کو لائے۔ آپ نے اسے آٹھ سو دیا۔ نضر بن انس پاس سے گزرے، عمر (رض) نے فرمایا : اس کے لیے دو ہزار مقرر کر دو ۔ طلحہ نے کہا : میں بھی اس کی مثل آپ کے پاس لایا ہوں، اس کے لیے آٹھ سو اور اس کے لیے دو ہزار مقرر کیے ہیں ؟ عمر (رض) نے کہا : اس کا باپ احد کے دن مجھ سے ملا، اس نے مجھے کہا : رسول اللہ (صلی اللہ علیہ وآلہ وسلم) نے کیا کیا ؟ میں نے کہا : میں نہیں خیال کرتا کہ آپ قتل کردیے گئے ہیں، اس نے اپنی تلوار پکڑی اس کے نیام کو توڑا، اس نے کہا : اگر رسول اللہ (صلی اللہ علیہ وآلہ وسلم) قتل کر دییگئے ہیں تو اللہ زندہ ہے وہ نہیں فوت ہوگا، پس وہ لڑے حتیٰ کہ شہید کردیے گئے اور وہ فلاں فلاں جگہ بکریاں چراتے تھے۔