(١٣١٠٨) ہشام بن زید فرماتے ہیں : میں نے انس بن مالک (رض) سے سنا، وہ کہتے تھے۔ ابوبکر اور عباس (رض) انصار کی کسی مجلس کے پاس سے گزرے اور وہ رو رہے تھے۔ کہا : تم کیوں رو رہے ہو ؟ انھوں نے کہا : رسول اللہ (صلی اللہ علیہ وآلہ وسلم) کی مجلس کو یاد کر کے رو رہے ہیں۔ پس ابوبکر (رض) نبی (صلی اللہ علیہ وآلہ وسلم) کے پاس گئے، آپ (صلی اللہ علیہ وآلہ وسلم) کو بتایا : آپ آئے اور آپ کے سر پر پٹی باندھی ہوئی تھی۔ آپ منبر پر چڑھے اور اس کے بعد منبر پر نہ چڑھ سکے آپ (صلی اللہ علیہ وآلہ وسلم) نے اللہ کی حمد وثناء بیان کی، پھر کہا : میں تم کو انصار کے بارے میں وصیت کرتا ہوں کہ وہ میرے جسم وجان ہیں، انھوں نے اپنی تمام ذمہ داریاں پوری کی ہیں، لیکن اس کا بدلہ جو انھیں چاہیے تھا وہ ملنا ابھی باقی ہے۔ اس لیے تم بھی ان کی نیکیوں کی قدر کرنا اور ان کی غلطیوں سے درگزر کرنا۔