(١٣٣٥٨) انس بن مالک فرماتے ہیں کہ دحیہ کے حصے میں ایک لونڈی آئی، آپ (صلی اللہ علیہ وآلہ وسلم) کو بتایا گیا کہ اے اللہ کے نبی ! دحیہ کے حصے میں خوبصورت لونڈی آئی ہے تو نبی (صلی اللہ علیہ وآلہ وسلم) نے اس کو سات ارؤس کے بدلے خرید لیا ۔ پھر اس کو ام سلیم کی طرف لوٹا دیا تاکہ وہ اس کو تیار کردیں، راوی کہتا ہے کہ میرا خیال ہے وہ اپنے گھر میں عدت گزار رہی تھیں ور وہ صفیہ بنت حیی تھیں، آپ نے کھجور پنیر اور گھی سے ولیمہ کیا۔ زمین کُرید کُرید کر برابر کردی گئی اور پھر دستر خوان لایا گیا، وہ بچھایا گیا۔ پھر کھجور، پنیر اور گھی کو لایا گیا اور لوگ سیراب ہوگئے۔ راوی کہتا ہے کہ لوگوں نے کہا : ہم نہیں جانتے کہ یہ لونڈی ہے کہ بیوی۔ راوی کہتا ہے : انھوں نے کہا : اگر اس نے پردہ کیا تو یہ آپ (صلی اللہ علیہ وآلہ وسلم) کی بیوی ہے، اگر پردہ نہ کیا تو لونڈی ہوگی۔ جب انھوں نے سوار ہونے کا ارادہ کیا تو اس نے پردہ کرلیا یہاں تک کہ وہ اونٹ کی پچھلی طرف بیٹھ گئیں تو انھوں نے پہچان لیا کہ آپ (صلی اللہ علیہ وآلہ وسلم) نے شادی کرلی ہے۔