(١٣٤٤٧) انس (رض) فرماتے ہیں کہ تین آدمی نبی (صلی اللہ علیہ وآلہ وسلم) کی بیویوں کے پاس آئے اور وہ آپ (صلی اللہ علیہ وآلہ وسلم) کی عبادت کے بارے میں سوال کرنے لگے، جب ان کو عبادت کے بارے میں بتایا گیا تو انھوں نے اپنی عبادت کو کم سمجھا اور انھوں نے کہا کہ ہم نبی (صلی اللہ علیہ وآلہ وسلم) سے کیسے مل سکتے ہیں ؟ حالانکہ آپ (صلی اللہ علیہ وآلہ وسلم) کے اگلے پچھلے گناہ بھی اللہ پاک نے معاف کیے ہوئے ہیں۔ ان میں سے ایک نے کہا کہ میں ہمیشہ نماز پڑھتا رہوں گا، دوسرے نے کہا کہ میں ہمیشہ روزے رکھتا رہوں گا اور کبھی چھوڑوں گا نہیں اور تیسرے نے کہا کہ میں عورتوں سے الگ رہوں گا اور کبھی شادی نہیں کروں گا، نبی (صلی اللہ علیہ وآلہ وسلم) ان کی طرف آئے اور پوچھا کہ تم نے ایسے ایسے کہا ہے میں تمہاری نسبت اللہ سے زیادہ ڈرنے والا اور زیادہ متقی ہوں، اس کے باوجود میں روزے بھی رکھتا ہوں اور چھوڑتا بھی ہوں۔ میں نماز بھی پڑھتا ہوں اور سوتا بھی ہوں اور میں نے شادی بھی کی ہے۔ جس نے ہماری سنت سے بےرغبتی کی وہ ہم میں سے نہیں ہے۔