(١٣٥٠٤) عمر بن خطاب (رض) فرماتے ہیں کہ میرے رب نے تین مقام پر میری موافقت کی ہے۔ میں نے کہا : اگر ہم مقام ابراہیم کو مصلی بنالیں تو اللہ تعالیٰ نے یہ آیت نازل کی { وَاتَّخِذُوا مِنْ مَقَامِ إِبْرَاہِیمَ مُصَلًّی } [البقرۃ ] میں نے کہا : اے اللہ کے رسول (صلی اللہ علیہ وآلہ وسلم) آپ پر نیک لوگ بھی اور برے بھی داخل ہوتے ہیں۔ آپ (صلی اللہ علیہ وآلہ وسلم) امہات المومنین کو پردے کا حکم دیں تو اللہ تعالیٰ نے یہ آیت نازل کردی : { یا ایہا النبی قل لازواجک وبناتک ونساء المومنین } اور انھوں نے بیان کیا کہ مجھے بعض ازواج مطہرات سے نبی کریم (صلی اللہ علیہ وآلہ وسلم) کی خفگی کی خبر ملی۔ میں ان کے پاس گیا اور کہا : باز آجاؤ ورنہ اللہ تعالیٰ تم سے بہتر بیویاں آپ کے لیے بدل دے گا۔ بعد میں امہات المومنین میں حضرت ام سلمہ آئیں اور کہا : اے عمر ! تم اپنی ازواج کو اتنی نصیحت نہیں کرتے جتنی تم انھیں (امہات المومنین) کو کرتے ہو تو اللہ تعالیٰ نے یہ آیت نازل کی : { عَسَی رَبُّہُ إِنْ طَلَّقَکُنَّ أَنْ یُبْدِلَہُ أَزْوَاجًا خَیْرًا مِنْکُنَّ }[التحریم ٥]