(١٣٧٥٦) ہشام اپنے والد سے اور وہ حضرت عائشہ (رض) سے نقل فرماتے ہیں کہ حضرت بریرہ نے اپنی آزادی کے لیے ٩ اوقیوں پر مکاتبت کرلی کہ ایک سال میں ایک اوقیہ ادا کرنا ہے وہ اپنی مدد کے لیے حضرت عائشہ (رض) کے پاس آئی تو حضرت عائشہ (رض) نے فرمایا : اگر وہ چاہیں تو میں ایک ہی مرتبہ قیمت ادا کر دوں گی اور ولاء میری ہوگی۔ حضرت بریرہ نے جا کر اپنے گھر والوں سے بات کی، انھوں نے انکار کردیا، لیکن ولاء کی شرط پر آمادگی ظاہر کی۔ حضرت بریرہ حضرت عائشہ (رض) کے پاس آئی اور وہاں رسول اللہ (صلی اللہ علیہ وآلہ وسلم) بھی آگئے تو بریرہ نے حضرت عائشہ (رض) کو وہ بات آکر کہہ دی تو حضرت عائشہ (رض) نے فرمایا : یہ صرف اس صورت میں ممکن ہے جب ولاء میری ہوگی تو رسول اللہ (صلی اللہ علیہ وآلہ وسلم) نے فرمایا : آپ خرید کر ولاء کی شرط رکھیں اور آزاد کردیں، کیونکہ ولاء تو آزاد کرنے والے کی ہوتی ہے۔ پھر آپ نے لوگوں کو خطبہ ارشاد فرمایا : اللہ کی حمدوثنا بیان کی اور فرمایا لوگوں کو کیا ہے ایسی شرطیں لگاتے ہیں جو کتاب اللہ میں موجود نہیں ہیں۔ کہتے ہیں : اے فلاں ! آزاد کر اور ولاء میری ہوگی۔ اللہ کی کتاب زیادہ سچی ہے اور اللہ کی شرطیں زیادہ قابل اعتماد ہیں اور جو شرط کتاب اللہ میں نہیں وہ باطل ہے اگرچہ وہ سو شرطیں ہوں۔ حضرت عائشہ (رض) فرماتی ہیں کہ رسول اللہ (صلی اللہ علیہ وآلہ وسلم) نے بریرہ کو اس کے خاوند کے بارے میں اختیار دے دیا۔ ان کا خاوند غلام تھا تو بریرہ نے اپنے نفس کو اختیار کرلیا (یعنی اس سے آزاد ہوگئی) عروہ کہتے ہیں : اگر وہ آزاد ہوتا تو نبی (صلی اللہ علیہ وآلہ وسلم) بریرہ کو اختیار نہ دیتے۔
(ب) اسحق بن ابراہیم کی روایت مسلم میں ہے۔ اس میں وہ دلالت موجود ہے جس کا ہم نے قصد کیا ہے اور ولاء صرف آزاد کرنے والے کے لیے ہے غیر کے لیے نہیں۔ ولاء کے احکام سے نکاح کی ولایت بھی ثابت ہوتی ہے۔ جب کوئی مناسبت ولی موجود نہ ہو۔
کفو کے اعتبار کے لیے دوسری احادیث بھی موجود ہیں لیکن ان سے دلیل لینا درست نہیں ہے۔ (واللہ اعلم)