(١٣٨٢٤) حضرت میمونہ بنت کردم فرماتی ہیں میں اپنے والد کے ساتھ تھی کہ میں نے رسول اللہ (صلی اللہ علیہ وآلہ وسلم) کو مکہ میں اپنی اونٹنی پر سوار دیکھا اور رسول اللہ (صلی اللہ علیہ وآلہ وسلم) کے ہاتھ میں کتاب کے مکتب کی طرح کچھ تھا۔ میں نے دیہاتیوں اور لوگوں کو سنا وہ کہہ رہے تھے قدموں کی چاپ، قدموں کی چاپ۔ میرے والد نے قریب ہو کر آپ (صلی اللہ علیہ وآلہ وسلم) کے نشانات قدم پر چلنا شروع کیا تو رسول اللہ (صلی اللہ علیہ وآلہ وسلم) ٹھہر گئے۔ میمونہ کہتی ہیں کہ میں رسول اللہ (صلی اللہ علیہ وآلہ وسلم) کے پاؤں کی سبابہ انگلی جو پاؤں کی تمام انگلیوں سے زیادہ لمبی تھی۔ اس کو نہ بھولی۔ اس نے آپ (صلی اللہ علیہ وآلہ وسلم) سے کہا : میں جیش عشران میں تھا۔ کہتی ہیں کہ رسول اللہ (صلی اللہ علیہ وآلہ وسلم) اس لشکر کو پہچانتے تھے تو طارق بن مرقع نے کہا : کون مجھے اچھے بدلے کے عوض نیزہ دے گا۔ میں نے کہا : اس کا بدلہ کیا ہوگا ؟ اس نے کہا : جو میری پہلی بیٹی ہوگی اس کا نکاح دے دوں گا۔ کردم کہتے ہیں : میں نے اس کو اپنا نیزہ دے دیا، اس کے ہاں بیٹی پیدا ہو کر بالغ ہوگئی۔ میں نے آکر کہہ دیا کہ میری گھر والی کو میرے لیے تیار کرو تو طارق کہنے لگے : اس کے علاوہ حق مہر دو تو تیار کردیتا ہوں وگرنہ اللہ کی قسم ! ایسا نہ کروں گا۔ میں نے بھی قسم اٹھا کر کہا ایسا نہ کروں گا تو رسول اللہ (صلی اللہ علیہ وآلہ وسلم) نے فرمایا : یہ عورتوں میں سے کس کے مماثل ہے۔ میں نے کہا : اس نے بڑھاپے کی ابتدا کو دیکھ لیا ہے۔ کہتے ہیں کہ رسول اللہ (صلی اللہ علیہ وآلہ وسلم) نے میری طرف دیکھا اور فرمایا : اس کو چھوڑ دو ۔ آپ کے لیے اس میں بھلائی نہیں ہے، کہتے ہیں : اس نے مجھے ڈرایا اور میری طرف دیکھا تو رسول اللہ (صلی اللہ علیہ وآلہ وسلم) نے فرمایا : نہ آپ گناہ گار ہوں گے اور نہ وہ۔