(١٣٨٥٨) ابو معبد فرماتے ہیں کہ حضرت عبداللہ بن عباس (رض) کا ایک غلام تھا، اس نے اپنی بیوی کو دو طلاقیں دے دیں، حضرت عبداللہ بن عباس (رض) نے فرمایا : رجوع کرو۔ اس نے انکار کردیا تو حضرت عبداللہ بن عباس (رض) نے فرمایا : یہ تیری ملکیت ہونے کی وجہ سے حلال ہے (یعنی نکاح کی وجہ سے)
دلالت : یہ حدیث دلالت کرتی ہے کہ حضرت عبداللہ بن عباس (رض) نے دو طلاقوں کے بعد غلام کو رجوع کا حکم دیا لیکن اس نے انکار کردیا تو حضرت عبداللہ بن عباس (رض) کا اعتقاد تھا کہ غلام بغیر اجازت کے طلاق نہیں دے سکتا، اس لیے تو فرمایا : یہ تمہاری ملکیت ہے (یعنی نکاح کی وجہ سے) حالانکہ ایک جماعت کا اتفاق ہے کہ اس کی طلاق درست ہے۔ واللہ اعلم
امام شافعی (رح) فرماتے ہیں کہ اللہ نے مالکوں کو لونڈی سے شادی کرنا جائز رکھا ہے اور غلام فی الحال اس کا مالک نہیں ہے۔ اللہ تعالیٰ کا ارشاد ہے : { ضَرَبَ اللّٰہُ مَثَلًا عَبْدًا مَّمْلُوْکًا لَّا یَقْدِرُ عَلٰی شَیْئٍ } [النحل ٧٥] ” اللہ نے ایسے غلام کی مثال بیان کی جو کسی چیز پر قدرت نہیں رکھتا۔ “
(ب) حضرت عبداللہ بن عمر (رض) سے روایت ہے کہ آپ (صلی اللہ علیہ وآلہ وسلم) نے فرمایا : جس نے غلام فروخت کیا اور غلام کا مال بھی تھا تو مال فروخت کرنے والے کا ہے، الایہ کہ خریدنے والا شرط لگالے۔