(١٣٩٧٣) مجاہد اللہ تعالیٰ کے اس فرمان : { وَلَا تُمْسِکُوْا بِعِصَمِ الْکَوَافِرِ } [الممتحنۃ ١٠] ” اور کافرہ عورتوں سے نکاح مت کرو۔ “ کہتے ہیں کہ صحابہ (رض) کو حکم دیا گیا کہ وہ کافرہ عورتوں کو جو مکہ میں رہ گئی ہیں ان کو طلاق دے دو ۔
امام شافعی (رح) فرماتے ہیں : اللہ کا فرمان : { وَ لَا تَنْکِحُوا الْمُشْرِکٰتِ حَتّٰی یُؤْمِنَّ وَ لَاَمَۃٌ مُّؤْمِنَۃٌ خَیْرٌ مِّنْ مُّشْرِکَۃٍ } [البقرۃ ٢٢١] ” اور مشرکہ عورتوں سے نکاح نہ کرو۔ یہاں تک کہ وہ ایمان لائیں اور مومنہ لونڈی آزاد مشرکہ عورت سے بہتر ہے۔ “ فرماتے ہیں : یہ آیت مکہ کے مشرکین جو بتوں کے پجاری تھے ان کے بارے میں نازل ہوئی، ان کی عورتوں سے نکاح حرام ہے جیسے ان کے مرد مومنہ عورتوں سے نکاح نہیں کرسکتے، اگر یہ اس طرح ہی ہے تو پھر یہ آیت منسوخ نہیں ہے۔