(١٤٠٤) (الف) سیدنا ابن عمر (رض) سے روایت ہے کہ عمر بن خطاب (رض) کھڑے ہو کر جمعہ کا خطبہ دے رہے تھے، اچانک ایک شخص اولین مہاجرین میں سے آیا، سیدنا عمر (رض) نے اس کو آواز دی کہ یہ کونسا وقت ہے ؟ اس نے کہا : آج میں مصروف رہا۔ میں اپنے گھر نہیں گیا، میں نے اذان سنی تو میں وضو کرنے سے زیادہ نہیں کرسکا۔ سیدنا عمر (رض) نے کہا : صرف وضو ؟ حالانکہ تو جانتا ہے کہ رسول اللہ (صلی اللہ علیہ وآلہ وسلم) غسل کا حکم دیا کرتے تھے۔ (ب) امام بخاری (رح) نے عبداللہ بن اسماء سے یہ روایت بیان کی ہے۔ امام مالک (رح) نے مؤطا میں مرسل نقل کی ہے اور سیدنا عبداللہ بن عمر (رض) کا سند میں ذکر نہیں کیا۔ مؤطا کے علاوہ میں موصولاً بیان کی گئی ہے اور یہی صحیح ہے۔ امام زہری سے بھی یہ موصولاً منقول ہے۔