(١٤١٤٣) حضرت عبداللہ فرماتے ہیں کہ ہم جوان تھے، ہم نے رسول اللہ (صلی اللہ علیہ وآلہ وسلم) سے خصی ہونے کی اجازت طلب کی تو آپ نے فرمایا : نہیں، پھر آپ (صلی اللہ علیہ وآلہ وسلم) نے کپڑے کے عوض وقت مقررہ تک کسی عورت سے نکاح کی اجازت فرمائی، پھر حضرت عبداللہ نے یہ آیت تلاوت کی : { یٰٓاَیُّہَا الَّذِیْنَ اٰمَنُوْا لَا تُحَرِّمُوْا طَیِّبٰتِ مَآ اَحَلَّ اللّٰہُ لَکُمْ } [المائدۃ ٨٧] ” اے ایمان والو ! اللہ کی حلال کردہ پاکیزہ چیزوں کو حرام نہ کرو۔ “
نوٹ : ابوبکر بن ابی شیبہ کی مسلم میں روایت ہے جو فتح مکہ یا فتح خیبر سے پہلے ہونے پر دلالت کرتی ہے اور حضرت عبداللہ بن مسعود ٣٢ ہجری میں فوت ہوئے، جب وہ فوت ہوئے تو ان کی عمر تقریباً ٦٠ برس سے زیادہ تھی اور فتح خیبر تقریباً ٧ ہجری کو ہوئی اور فتح مکہ ٨ ہجری کو ہوئی اور حضرت عبداللہ اس وقت تقریباً ٤٠ برس کے تھے اور جوانی اس سے پہلے ہوتی ہے۔