(١٤١٧٠) حضرت جابر (رض) فرماتے ہیں کہ ابن زبیر (رض) متعہ سے منع کرتے جبکہ ابن عباس (رض) متعہ کا حکم فرماتے۔ کہتے ہیں : میرے سامنے حدیث تھی کہ ہم نے نبی (صلی اللہ علیہ وآلہ وسلم) اور ابوبکر (رض) کے ساتھ متعہ کیا، لیکن جب حضرت عمر (رض) خلیفہ بنے تو انھوں نے لوگوں کو خطبہ ارشاد فرمایا کہ یقیناً یہ اللہ کے رسول (صلی اللہ علیہ وآلہ وسلم) ہیں اور یہ قرآن ہے، متعہ کی رسول اللہ (صلی اللہ علیہ وآلہ وسلم) کے دور میں اجازت تھی لیکن میں ان دونوں متعوں سے منع کرتا ہوں اور ان کی وجہ سے سزا بھی دیتا ہوں : 1 عورتوں سے متعہ کرنا۔ میں نے جس آدمی کو بھی پکڑ لیا، پتھر مار مار کر رجم کر دوں گا۔ 2 اور دوسرا متعہ یعنی حج میں فائدہ اٹھانا۔ تم اپنے حج کو عمرہ سے جدا کرو۔ یقیناً تمہارا حج کو پورا کرنے والا عمرہ کو زیادہ احسن انداز سے پورا کرنے والا ہے۔
نوٹ : شیخ فرماتے ہیں کہ رسول اللہ (صلی اللہ علیہ وآلہ وسلم) کے دور میں ان کے جواز میں کوئی شک نہیں ہے، لیکن نکاح متعہ سے تو رسول اللہ (صلی اللہ علیہ وآلہ وسلم) نے فتح مکہ کے سال اجازت کے بعد منع فرما دیا۔ رسول اللہ (صلی اللہ علیہ وآلہ وسلم) نے وفات تک اس کی اجازت نہ دی، حضرت عمر (رض) نے بھی رسول اللہ (صلی اللہ علیہ وآلہ وسلم) کی سنت کی موافقت کی بنا پر منع فرمایا۔ لیکن رسول اللہ (صلی اللہ علیہ وآلہ وسلم) نے حج تمتع سے منع نہ فرمایا تھا تو حضرت عمر (رض) نے حج تمتع سے منع فرمایا ان کے نزدیک حج وعمرہ کو الگ الگ کرنا افضل ہے، تاکہ حج وعمرہ کو مکمل طور پر احسن انداز سے ادا کیا جائے، لیکن حج تمتع سے ممانعت تنزیہی ہے نہ کہ تحریمی۔