(١٤٧٤٩) محمد بن عبدالرحمن بن حارث بن ہشام (رض) فرماتے ہیں کہ حضرت عائشہ (رض) فرماتی ہیں کہ ازواج مطہرات نے نبی (صلی اللہ علیہ وآلہ وسلم) کی بیٹی فاطمہ (رض) کو رسول اللہ (صلی اللہ علیہ وآلہ وسلم) کی طرف بھیجا جس وقت آپ حضرت عائشہ کے ساتھ ان کی چادر میں لیٹے ہوئے تھے تو رسول اللہ (صلی اللہ علیہ وآلہ وسلم) نے حضرت فاطمہ (رض) کو اجازت دے دی۔ حضرت فاطمہ (رض) کہتی ہے : اے اللہ کے رسول (صلی اللہ علیہ وآلہ وسلم) ! آپ کی بیویوں نے مجھے آپ کے پاس بھیجا ہے کہ آپ ابو قحافہ کی بیٹی کے بارے میں ہم سے عدل کریں، حضرت عائشہ (رض) کہتی ہیں : میں خاموش تھی فرماتی ہیں کہ نبی (صلی اللہ علیہ وآلہ وسلم) نے فرمایا : کیا تو اس سے محبت نہیں کرتی جس سے میں محبت کرتا ہوں۔ فاطمہ (رض) کہتی ہیں : کیوں نہیں تو آپ (صلی اللہ علیہ وآلہ وسلم) نے فرمایا : تو اس سے محبت کر۔ حضرت عائشہ (رض) فرماتی ہیں کہ حضرت فاطمہ نبی (صلی اللہ علیہ وآلہ وسلم) سے یہ سن کر کھڑی ہوگئیں اور واپس جا کر ان کو وہ بات بتائی جو نبی (صلی اللہ علیہ وآلہ وسلم) نے اس سے کہی تھی، وہ حضرت فاطمہ (رض) سے کہنے لگیں : آپ نے تو ہماری جانب سے کچھ بھی نہ کیا، دوبارہ جا کر نبی (صلی اللہ علیہ وآلہ وسلم) سے کہو کہ آپ کی بیویاں ابو قحافہ کی بیٹی کے بارے میں عدل کا سوال کرتی ہیں۔ حضرت فاطمہ کہنے لگیں کہ اب میں اس بارے میں کلام بھی نہ کروں گی۔ حضرت عائشہ (رض) فرماتی ہیں کہ ازواج مطہرات نے نبی (صلی اللہ علیہ وآلہ وسلم) کی بیوی زینب بنت جیش کو بھیجا، یہ ان میں سے سب سے زیادہ میرے برابر تھی لیکن زینب سے بڑھ کر دین کے بارے میں اچھی عورت میں نے نہیں دیکھی۔ سب سے زیادہ اللہ سے ڈرنے والی، سچی بات کرنے والی، صلہ رحمی کرنے والی، بہت زیادہ صدقہ کرنے والی اور نیکی کام میں اپنے آپ کو مصروف رکھنے والی، جن کے ذریعے اللہ رب العزت کا قرب حاصل کیا جائے، لیکن زبان کی تیز تھیں، غصہ جلد ختم ہوجاتا تھا۔ فرماتی ہیں کہ انھوں نے رسول اللہ (صلی اللہ علیہ وآلہ وسلم) کے پاس آنے کی اجازت طلب کی تو رسول اللہ (صلی اللہ علیہ وآلہ وسلم) حضرت عائشہ (رض) کے گھر ان کی چادر میں ساتھ لیٹے ہوئے تھے۔ اس نے زبان درازی کی تو میں نے رسول اللہ (صلی اللہ علیہ وآلہ وسلم) کا انتظار کیا اور آپ کی طرف دیکھا کہ کیا آپ اجازت دیتے ہیں، فرماتی ہیں کہ زینب بنت جحش نے بات جاری رکھی تو میں نے پہچان لیا کہ رسول اللہ (صلی اللہ علیہ وآلہ وسلم) میرے انتقام کو ناپسند نہ کریں گے۔ کہتی ہیں : جب میں شروع ہوئی تو میں نے خوب ڈانٹ پلائی۔ کہتی ہیں کہ رسول اللہ (صلی اللہ علیہ وآلہ وسلم) ہنس رہے تھے اور فرمایا : ابوبکر (رض) کی بیٹی ہے۔ دوسری روایت میں ہے کہ میں اس سے الگ ہوگئی۔